Shillong, Nailar 08:
Ka Hynñiewtrep Integrated Territorial Organisation (HITO) Umsning Circle ha ka jingïalam u President, u Samla Bankit Kyrsian ha ka 8 Tarik Nailar, 2025 ki la pynher krad noh ïa ki bar jylla kiba wan trei bylla ha Umran Dairy, Ribhoi District namar ka jingbym pynbiang ki kot ki sla jong ki.
Kane ka jingleit khynra ka seng ïa kitei ki bar jylla ka dei hadien ba ki nongshong shnong jong ka Umran Dairy ki la pyntip sha ka Seng halor ka jingdon ki bar jylla kiba trei ha kawei ka ïing bad haba ka seng ka la leit ban peit ha katei ka jaka ka la lap ba kine ki bar jylla kim don satia ïa ki kot ki sla kiba biang, kumta ka Seng ka la phah noh ïa kitei ki bar jylla ba kin leit phai sha ka jaka ba ki wan.
Na ka liang ka seng ka buh ka jingkyntu ïa ki trai kiba ai bylla ïa ki barjylla ba kin phah pynbiang shwa ïa ki kot ki sla hashwa ba kin wanrah ïa ki nongtrei bylla nabar ka Jylla.
“Naka por sha ka por ngi la ong ba ngim khang ïa ka jingtrei jong ki hynrei ki dei ban pynbiang shwa ïa ki kot ki sla kiba dei ban pynbiang bad hadien kata sa wanrah”, ong u Samla Kyrsian.
Da kaba pynpaw ruh ïa ka jingsngewkhia hadien ka jingpyndam noh ïa ka jinglong nongshong shnong bad ka jingkhynra jong ka sorkar Assam ïa ki Bangladeshi ha katei ka Jylla, ka Seng ka ong ba kane ka la pynlong ïa ka Seng ba kan dap da ka jingsngewkhia kaba jur namar lehse, kine ki nong Bangladesh kin wan ban buhai shnong sha Meghalaya, kaba lah ban wanrah ïa ka jingkiew jong ka jingwan rung beaiñ (influx) sha ka jylla.
