Jowai, Nailar 08
Ka Referees Committee jong ka West Jaiñtia District Sports Association (WJDSA), Jowai, ka la pynlong ïa ka Referees Clinic-cum-Examination 2025 naduh ka 4 haduh ka 7 tarik Nailar ha Kiang Nangbah Stadium, Ladthadlaboh na ka bynta kito ki referee football kiba pyntbit shuh-shuh kumjuh na ka bynta kiba thymmai.
Ïa kane ka prokram ba saw sngi la pynlong hapoh ka jingpeit jong u Joychandra Singh uba dei u Zonal Referee’s’ Development Officer jong ka All India Football Federation (AIFF) ha ryngkat u Bah R. Synnah uba dei u heh jong ki Referee ka Meghalaya Football Association bad u Max John Nongsiej uba dei u Referee Assessor.
Ki la don haduh 60 ngut baroh ki referee kiba la wan ïashim bynta ha kane ka clinic- kata 26 ngut kiba la wan na ka bynta ban pyntbit shuh-shuh katba 34 ngut kiba thymmai.
Kane ka clinic ka kynthup ruh ïa ki jinghikai ha ki kamra klas, ka jingkoit jingkhiah ha ka met ka phad, ki jingpyni lyngba ka practical session, ka jingbishar bniah kiba ïadei katkum ka standard jong ka AIFF.
Kane ka sienjam pynpaw ïa ka jingaiti jong ka WJDSA ban ai jinghikai ïa ki referee kiba tbit bad ban pynkhlain ïa ka jingïalehkai phutbol ha ka thaiñ. Nalor kata ka ai ruh ka lad ïa ki samla kiba don ka jingangnud ha ka kam kam pynïaid phutbol.
Lah ban kdew ba u Bulmi Phawa uba dei u nonghikai skul na Nonglatem dang shen u la pyndep ïa baroh saw tylli ki bynta jong ka AIFF National Referee Examination (Level 5) na ka bynta u snem 2023, bad kylla long u National Referee uba nyngkong eh napoh West Jaiñtia Hills hadien kumba 11 snem.
U National Referee uba nyngkong eh na Jaintia Hills u dei u Rumanium Syngkon uba la pass ïa ka national exam ha u 2005. Ka jingïashim bynta ba khatduh jong u ha ka Cooper Test ka dei ha u 2013, hynrei u la bteng ban pynïaid ïa ki jingïalehkai ha ka thain hapoh ka WJDSA.
Ka WJDSA ka pynpaw ruh ka jingsngew sarong ban pynmih ïa ka referee kynthei ba nyngkong eh na kane ka thaiñ, ka Kong Riiohlang Dhar kaba shakri mynta ha ka Tnad pulit ka Meghalaya.Ka jingïaid lynti ka jong ka, ka ïeng kum ka jingai mynsiem kaba khlain ïa kiwei pat ki para kynthei ha ka kam pynïaid ïa ki jingïalehkai sport.
Ka Association ka pynpaw ka jingsngewnguh ïa ki nonghikai, ki nongpeit bniah bad ki nongiashim bynta, bad kyrmen ba kane ka clinic kan ai mynsiem hapdeng ki samla kiba don ïa ka jingangnud.
