Shillong, Nailar 08:
Ka National Commission for Women (NCW) ha ka jingïatreilang bad ka Future Shift Labs (FSL) ha ka sngi Thohdieng ka la pynlong ïa ka jingïalang ïaphylliew jingmut bad ka jinghikai halor ka YASHODA Artificial Intelligence (AI) kaba la pynlong ha National Law University, Shillong bad kaba long ruh ha ka sien kaba nyngkong ban pynlong ïa kane ka prokram ha Meghalaya.
Kane ka prokram ka long ban pynkhreh na ka bynta ka lawei jong ki nongïasaid aiñ, ki nongbishar, ki nongthawaiñ ba kin tip kumno ban pyndonkam da ka AI ha ka liang ka jingbishar bad ha ka liang ka imlang sahlang. Ki mat kiba ïakren ha kane ka sngi ki long ka jingktah ka AI ha ka liang ka rukom bishar, ka Cyber Law, ka ka jingshngaiñ ïa ki kynthei.
Nangta, ki jingeh halor ka jingpyndonkam ïa ki ‘data’ bad ki jinghikai shaphang ka Chat Gpt, Cyber Dost bad ka NCW Women Safety App Ka Chairperson jong ka NCW, ka Vijaya Rahatkar, haba ai jingkren ka la banjur halor ka jingdonkam jong ka AI bad ka aiñ kumno ban ïada ïa ki briew ha kane ka juk kor ‘digital’.
“Da kaba hikai ïa ki samla lyngba ka jingstad ‘digital’ ngi lah ban ai lang ka jingtip ha baroh kawei ka ri India shaphang kane”, ka la ong. U Nongseng ïa ka Future Shift Labs, u Nitin Narang u la ong ba ki khynnah pule Aiñ ki long ki nongïalam ha ka liang ka jingbishar bad ka hok lyngba ka ‘digital’ bad ula kren halor ka jingdonkam ban pyrkhat jylliew halor ka hok, bad kumno ban shim jingkitkhlieh ha ka juk ba synshar ka AI.
