Imphal, Nailar:
Ki bor pahara ha Manipur, ki la kem ïa arngut ki dkhot jong ka ba la shah ñiew beaiñ Kangleipak Communist Party (People’s War Group) – KCP (PWG) – ha ka por ba ki pynlong ïa ki jingïaid lynti ba kyrpang ha ka 6 tarik u Nailar.
Ka jingkem kaba nyngkong ka long ha Yurembam Awang Leikai kaba hap hapoh thanat Patsoi ha Imphal West district, ha kaba la kem ïa u Leiphrakpam Herojit Meetei (41 snem) na ka jaka sah jong u. La kynnoh ba u donkti ban dawa pisa na ki paidbah ban pynmih pisa ha ka kynhun. Na ka met jong u la ïoh ban kurup kawei ka mobile phone bad kawei ka Aadhaar Card.
Ha kawei pat ka jingkhynra ba la ïalam da ki bor syntiat, ki bor pahara ki la ïoh ban kem ïa u Ingudum Tularanjan Meitei ïa uba la tip ruh da ka kyrteng kum u Abung (29 snem ka rta) na Taothong Mamang Leikai, kaba hap hapoh jong ka Lamshang Police Station, na Ahallup Lai Haraopham kaba don ha Imphal East district. La lap ba u don ka bek pisa kaba don T. 80 bad ka ID thep vote. Ka jingtohkit ba nyngkong ka la lap ba u donkti ha ka jingrahbor bad set ïa uwei u doktor na ka bynta ka jingdawa pisa ha Lamdeng Khunou ha u bnai Nailar, jong u snem 2024.
Ha ka jingleit khynra lehnoh kaba la pyntreikam kyrpang ha kane ka juh ka sngi, ki pulit ka Manipur ki la ïoh ban kurup ïa ka jaka buh tiar ïaleh bad ki tiar pynbthei na ka shnong Gothol kaba hap hapoh jong ka Churachandpur Police Station ha Churachandpur district.
Ki bor pahara ki dang bteng ban pynlong ïa ki jingleit kerkut bad ka jingleit thwet lehnoh ha kylleng ki jaka ba rit paid bad ki jaka ba marjan jong ka jylla ban ïakhun pyrshah ïa ki kam lehnoh, ka jingdawa pisa, bad ki kam runar. Ki bor pynïaid ki la pynpaw ba ka jingpynkhlaiñ ia ka jingtreikam kan dang bteng ha ki sngi ban wan ban pynthikna ïa ka jingshngaiñ jong ki paidbah bad ka jingpyntreikam ïa ka aiñ.
