Imphal, Nailar:
Ki bor pahara ha Manipur na ka jingpynjur jong ki ïa ka jingtreikam kynthup ka jingleit khynra sha kylleng ki jaka ha ka 6 tarik u Nailar, ki la ïoh ïa ka jingjop ha kaba ki la lah ban pynpulom ïa ki kam beaiñ ba bun kiba la jia ha kylleng ki distrik jong ka Tengnoupal bad Imphal East.
Ha ka por ba la don ka jingpyntreikam kaba ju long man ka sngi, ha Khudengthabi Permanent Vehicle Check Post (PVCP) kaba don ha Tengnoupal distrik, la ïoh kem ïa lai ngut ki briew katba ki dang thmu ban khaïi beaiñ ia 13 tylli ki masi ha kawei ka kali.
Baroh kine kiba la shahkem ki dei ki nongshong shnong jong ka M. Chahnou Village kaba hap hapoh ka jingkhmih jong ki pulit ka Moreh Police Station, bad ïa kine la tip da ka kyrteng kum u Hemminlen Haokip (26), Shuhao Haokip (59), bad Henkholal Lhouvum (36).
Ki bor ba dei khmih, ki la kurup noh ïa kine ki masi, kiba la antad ba ki shongdor kumba T. 8.45 lak bad kawei ka kali saw shaka kaba don ïa u Number MN-07C-3345, kaba la kynnoh ba la pyndonkam na ka bynta katei ka kam khaïi tuh. Na ka jingtohkit kaba hashwa, la lap ba ki kot ki sla jong ka kali ki dei kiba shu thok.
Ha ka jingkhynra kaba kyrpang, ki pulit jong ka Manipur ki la kem ïa uwei u dkhot jong kawei ka kynhun ba la shahñiew beaiñ ka SOREPA. Ïa une uba la shahkem la tip kyrteng kum u Laihaorungbam Sanatomba Singh (47 snem) uba sah ha Kongpal Chingangbam Leikai kaba hap hapoh ka jingkhmih jong ki pulit ka Porompat, kaba don ha Imphal East, na ka ïing sah jong u.
Katkum ka jingïathuh jong ki pulit la ong ba une uba la shahkem u deonkti ha kiba bun ki kam dawa pisa kiba thmu ïa ki jaka pule, ki jaka die umphniang, ki ophis sorkar, ki jaka khaïi, bad na ki riewpaidbah ha ka thaiñ.
Ha ka por ba la pynlong ka jingkhmih bniah, na ka met jong u la ïoh ban kurup ar tylli ki mobile phone bad kawei ka Aadhaar Card.
Ha kajuh ka por, ki pulit ka Manipur ki la pynlong ruh ïa ka jingkhynra ïa ki kali bad weng ïa ki Tinted film na ki 16 tylli ki kali da kaba bud ryntih ïa ki kyndon pynïaid kali.
Ha kawei pat ka jaka, ki bor pynïaid ki la pynmih ïa ka jingpynbna ban peit bniah ïa ka jingshisha pyrshah ïa ka jingpynphriang ïa ka durkhih kaba ïalam bakla kaba la pyni thok kum ka dur ba la ring shabar jong ka Classic Hotel, Imphal, ha ka 6 tarik u Nailar.
Ïa kane ka durkhih ba la kdew katkum ka jinglap na ka tynrai, la ong ba la ring ha ka 7 tarik u Jylliew, hajan ka kad liengsuiñ Imphal.
Ki pulit ki la maham ban leh da ka aiñ kaba tyngeh pyrshah ïa ki briew kiba pynsaphriang ïa kum kine ki jingleh jingkam ha ki durkhih.
