Shillong, Nailar 08
Ka United Democratic Party (UDP) ka la jied ïa u nongïalam ka Liang Pyrshah ka KHADC, u Bah Titosstarwell Chyne kum u State General Secretary bathymmai jong ka seng.
Ïa kane la ïathuh da u khlieh nongïalam ka UDP, Bah Metbah Lyngdoh hadien ka jingïalang Central Executive Committee (CEC) jong ka seng kaba la long ha ka Sngi Thohdieng.
“Da kawei ka sur ngi la mynjur ïa ka kyrteng jong u Bah Titosstarwell Chyne kum u General Secretary bathymmai jong ka seng,” la ong u Bah Lyngdoh haba kren sha ki lad pathai khubor.
Haba kylli la ka CEC ka la ïakren ne em halor ka jingbujli shuki ha ka Kynhun Myntri, u President u la ong ba watla katto-katne ngut ki nongïalam ki la pynpaw ïa kane ka mat, ka CEC kam dei ka rynsan ban ïakren halor kane ka sobjek.
“Namarkata, ngi la shimkhia ïa ki jingai jingmut jong ki ha ka jingïalang,” u la bynrap.
Haba pdiang sngewbha ïa ka rai jong ka seng, u Bah Chyne u la ong, “Nga pynpaw ka jingsngewnguh ïa ka CEC kaba la shem ba nga long uba biang ban long u General Secretary bathymmai jong ka seng.”
U General Secretary bathymmai u la pynpaw ruh ba ka jingthmu ba kongsan jong u kan long ban pynkhlaiñ shuh-shuh ïa ka seng bad ban pyntikna ïa ka jingïatreilang kaba ïajan hapdeng ki nongmihkhmat ba shah jied bad ka seng.
“Nga pyntikna ba ngan pyndep ïa ka kamram ba la bynshet ha nga,” la ong u Bah Chyne da kaba bynrap ba ka jingtreikam jong ka seng ka la shah ktah ha kine ki khyndiat bnai ba la dep hadien ka jingieh noh kam jong u General Secretary barim, u Dr. Jemino Mawthoh.
Hynrei u la pynpaw ka jingkyrmen skhem ïa ka lawei jong ka seng bad ong, “Nga ngeit skhem khamtam hadien ba nga la ïakynduh ïa ki President bad ki Secretary jong ki distrik bapher-bapher khnang ba ngin lah ban pynkhlaiñ shuh-shuh ïa ka seng. Kan don ka jingïatreilang kaba ïajan hapdeng ki nongmihkhmat ba shah jied bad ka seng nangne shakhmat.”
U Bah Chyne u la kren ruh halor ki jingkynnoh ba ïadei bad ka jingbym biang ka jingïadei hapdeng ka seng bad ki nongtrei ha ki kyrdan ba sha trai ha ki por bym don ilekshon, da kaba pynpaw ba ka seng ka don ïa ki jingthmu treikam ban tei ïa ki jingïadei bad ki nongtrei ha ki konstitwensi ki bym don ïa ki nongmihkhmat ba shah jied.
“Ban ong ba ka don ka jingbym ïadei, kam ju mih ha ki konstitwensi ba ka seng ka don ïa ki nongmihkhmat ba shah jied hynrei ha ki konstitwensi ba khlem ki nongmihkhmat – khlem artatien ngi ïakynduh katto-katne ki jingeh naba ka long kaba jynjar ïa ki kyrtong ki bym jop ban dang don ha ka jingïadei bad ki paidbah haduh san snem pura. Hynrei la don lypa ki saiñdur treikam ban tei ïa ka jingïadei hapdeng ki nongtrei ha ki konstitwensi ba khlem ki nongmihkhmat ba shah jied bad ka seng,” u la pynkut.
