New Delhi, Nailar:
Katkum ki khubor, la ong ba ha kum kane ka por jong ka thma pynngat khajna jong ka US, ha kaba ka US ka la leh bha bad kham pyrkhat na ka bynta ka Pakistan, u heh ka tnat shipai ka Pakistan- u Marshal Asim Munir, un sa leit ban jurip sha US ha ka sien kaba 2 tang hapoh jong ki 2 bnai, khnang ban pynskhem bad pynkhlaiñ ia ka jingiatreilang hapdeng ka Pakistan bad ka United States haba iadei bad ka khaïi- pateng jong ka Pakistan bad ka US. Kane ka jingleit jurip jong u sha US, ka long ruh ha kane ka por ba ka jingiadei hapdeng jong ka India bad ka US ka la sdang tlor noh namar ka jingbuh khajna heh jong ka US ia ki mar khaïi jong ka India, tang namar ka jingiatreilang jong ka India bad ka Russia, da kaba ka India ka thied ia ka umphniang jong ka Russia ha ka dor kaba bit bad ka pyniaid ioh nong pat ialade shimet. Ha kaba u Trump u la ong ruh ba kane ka jingleh jong ka India, ka la pynim bad kyntiew ia ka ioh- ka kot jong ka Russia hapdeng ka jingleit hiar thma ba khlem sangeh jongka pyrshah ia ka Ukraine.
Namar u President ka US, u Donald Trump, ha ki khyndiat sngi ba la leit, u dang dep pynbna ia ka 25% ka khajna ba la nang kyntiew shuh- shuh pyrshah ia ki mar khaïi jong ka India, kum ka jingpynshitom ia ka India namar ka jingiatrei lang bad ka Russia haba iadei bad ka jingshalan ia ka umphniang na Russia shapoh India.
