Washington, Nailar:
Ka sorkar jong u Donald Trump ka thmu ban tei ïa ka jaka shong ïa ki nongwan buhai shnong kaba heh tam jong ka sorkar pdeng ha ka jaka sah jong ki shipai ha Texas, la ong ka Pentagon ha ka Sngi Palei, ka sienjam ba khatduh eh ban pyndonkam ïa ki jaka shipai ban pynbha ïa ka jingthmu jong u ha kaba ïadei bad ki nongwan buhai shnong.
U Trump u la pynjur ïa ka jingkem ïa ki nongwan buhai shnong kiba leit rung be-aiñ sha U.S. bad u la pynshitom beiñ ruh ïa ki nongwan rung khappud be-aiñ bad u la weng noh ïa ka jinglong aiñ na ki spah hajar ngut ki nongwan buhai shnong, naduh ba u la ioh ban shimti biang ïa ka shuki President ha une u snem. Kumta la ong ba u Trump u la phah ïa ki nongwan buhai shnong sha ka ktem jong ki shipai duriaw ha Guantanamo Bay, watla ka long kaba duna bha ban ïa kaba la thmu.
Ka Pentagon ka la ong ba ka jingthmu ba nyngkong ka long ban bat ïa ki 1,000 ngut ki nongwan buhai shnong ha Fort Bliss ha El Paso, Texas, ha ka shiteng haduh kaba kut jong u bnai Nailar bad nangta yn pyndep ïa ka jingshna ïa ka jaka ba don 5,000 tylli ki jingthiah ha kine ki taiew bad ki bnai ban wan.
“Ynda la dep pyndep, kane kan long ka jaka pynshong ia ki phetwir, kaba heh tam ha ka histori na ka bynta kane ka kam kaba kongsan, ka jingpynkynriah noh ïa ki nongwei kiba be-aiñ,” la ong u Kingsley Wilson, u nongaiktien jong ka Pentagon haba iakren bad ki nongthoh khubor.
Katba ka sorkar US ka dang pyntrei ban tei ia katei ka jaka pynshong ia ki phetwir ha ka jaka sah jong ki shipai, la khmih lynti ba ka tnat pahara ri kan shim ka jingkit-khlieh kaba kham biang ia ki nongwan buhai shnong.
Ka jingshah set jong ki nongwan buhai shnong ha ki jaka sah jong ka U.S. kam dei kaba thymmai. Wat hapoh ka jingsynshar ba ha shuwa jong u Trump na ka Democratic, u Joe Biden, ka Pentagon ka la mynjur ïa ka jingkyrpad ban buh ïa ki khynnah kiba wan buhai shnong khlem nongbud ha ki jaka treikam jong ki shipai ha Texas.
Ka sorkar jong u Trump ka dang shna ruh ia kiwei pat ki jaka ban bat ia ki nongwan buhai shnong. Ka jaka sumar kaba don 1,000 tylli ki jingthiah ha Indiana ka la thmu ban plie bad la ai kyrteng thymmai ia ka kum ka “Ka jaka sumar stet.”
Ka sorkar Trump, ka la ïaroh ïa ki kam jong ka ha khappud, kynthup ïa ka jingpynkynriah ïa ki shipai kiba dang trei shitom, kum ka daw jong ka jinghiar kaba jur bha ha ka jingïaid lynti jong ki nongwan buhai shnong khlem kot don sla. U Trump u la pynlong ïa ka jingsngewkhia jong ki nongthep vote halor ka jingwan buhai shnong kum u mawjam jong ka jingïakhun ilekshon biang jong u ha u snem 2024.
Ka jingdon jong ki nongwan buhai shnong kiba la shah kem ha ki bor pynïaid jong ka Immigration and Customs Enforcement ka la kiew bun haduh katta ha kine ki taiew ba la dep, ha kaba ki don kumba 57,000 ngut kiba la shah kem tad haduh ka 27 tarik u Naitung, katkum ka jingbuh jingkheiñ jong ka ICE.
