Shillong, Nailar 08:
U Chief Secretary ka Jylla, u Bah Donald P. Wahlang ha ka Sngi Thohdieng u la ong ba ka Sorkar Jylla ka la shim ïa ki sienjam kiba biang ban pynbha ïa ka jingshah pynrem ha ki kam runar pyrshah ïa ki kynthei ha ka jylla.
Katkum ka jingong u Bah Wahlang, ka Sorkar ka la thaw kyrpang ïa ka Directorate of Prosecution, ka ban peit kyrpang ïa ki mukotduma jong ki jingpynngat.
“Ngi la shim ïa ki sienjam kiba biang na ka Sorkar Jylla da kaba thaw ïa ka Directorate of Prosecution kaba kyrpang mynta u snem (ban pynïaid kyrpang ïa ki mukotduma jong ki nongmudui),” u la ong ha ki nongthoh khubor haba pyntip ba la thung shuh shuh ïa ki nongmudui paidbah.
“Yn thung ïa ki nongbishar paidbah ha baroh ki distrik ban pynkhlaiñ ïa ka rukom pynngat mukotduma,” la pynbna ruh u Bah Wahlang.
Ka Sorkar ka thmu ban pynbha ïa ka jingshah rai pynrem da kaba pynïakhlad ïa ka jingtohkit bad ka jingpynngat mukotduma.
U Chief Secretary u la pynshai ba ka jingthaw ïa ki ‘Fast Track’ bad ki Ïingbishar ba kyrpang, ka shong ha ki aiñ bad ki aiñ ba kyrpang. Ula ong ba hangno hangno ba donkam, ka Sorkar ka la pyntip sha ki Ïingbishar ba stet ban pynsted ïa ka jingbishar.
Haba kylli, u Bah Wahlang u la pynshong nongrim ïa ki kam runar ba la pynpaw pyrshah ïa ki kynthei ha ki jingeh ha ka imlang sahlang kiba la don lypa ym ha ka jingkiew kaba kynsan kynsan. U la ban jur ba watla ka dei ka imlang sahlang kaba la pynshong nongrim ha ka kynthei ki kam runar pyrshah ïa ki kynthei ki dang jia, hynrei ym don sakhi ba ka la nang kiew dang shen.
“Kam dei ba ka don ka jingkiew kynsan jong ki kam runar pyrshah ïa ki kynthei hynrei kaei kaba nga kdew ka long ba kum ka jaitbynriew kaba ai jait sha ka kynthei, ka dei ban long ka jinglong kaba ngim don shibun ki kam runar hynrei ki kam runar ki don pyrshah ïa ki kynthei, ki don katto katne ki mukotduma hynrei kam dei ba ka don ka jingkiew,” u la bynrap.
Halor ka jingwan jngoh jong ka Chairperson ka NCW, u Bah Wahlang u la pyntip ba la pynlong ïa ka jingïalang kaba la pynleit jingmut halor ki mat bapher bapher kiba ktah ïa ki kynthei ha ka jylla, kynthup ïa ka jingdih drok bad ka jingshah thombor ha ïing ha sem.
Ka Chairperson ka NCW ka la pynpaw ïa ka jingsngewkhia halor ka jingkiew ki kam dih drok bad ki kam runar pyrshah ïa ki kynthei ha kane ka jylla Meghalaya.U Chief Secretary u la ïathuh lyngkot ïa ka Chairperson ka NCW shaphang ki jingthmu jong ka jylla, kynthup ïa ka One Stop Centre-ka jaka ba kyrpang na ka bynta ki kynthei kiba shah ktah ha ka jingshah thombor ha ïing ha sem, kaba ai jingkyrshan bad jingsumar- bad ka projek DREAM kaba thmu ban pynduh ïa ka jingdih drok bad ban ai jingkyrshan ïa kito kiba shah ktah.
U Bah Wahlang u la ong ba la pynsngew ruh ïa ka Chairperson ka NCW ïa ki sienjam ba la shim da ka Tnad Pulit ban weng ïa ka jingdih drok bad ka jingshah thombor ha ïing ha sem. Ka Chairperson ka la pynpaw katto katne ki jingsngewkhia hynrei ka la pynpaw ruh ïa ka jingsngewhun halor ka jingtrei jong ka Sorkar Jylla, u Bah Wahlang ula ong haba pyntip ba ka Chairperson ka NCW ka la pynbna ïa ki jingthmu ban wan jngoh biang ïa ka jylla Meghalaya hadien hynriew bnai ban bishar biang ïa ka jingïaid shaphrang jong ka Sorkar Jylla ha kaba weng ïa kine ki jingeh.
