Washington, Nailar:
U President ka US, u Donald Trump, sa shisien pat u la byrngem biang ban pyntlor ia ka iew iadie- iathied jong ka India namar ka jingiatreilang bad ka jingthied jong ka India ia ka Umphniang jong ka Russia, ha kaba u la pynpaw ba ka US kan pynngat da ki khajna kiba heh pyrshah ia ki mar khaïi jong ka India. Namar u la ong ba ka India, ym tang ba ka pynkiew bun ia ka ioh- ka kot jong ka Russia lyngba ka jingthied ia ka umphniang jongka, hynrei ka pyniaid iew ruh ia ka umphniang Russia ha ka rukom ban pynioh nong bun ialade.
Namar kane, u Trump u la ong ba ka US kan pyrkhat biang da kiwei pat ki kyndon ban pyngnat ia ka India bad ban pynshitom ia ka India da kaba pynjur ia ka khajna pyrshah ia ki mar khaïi jongka.
Kane ka jingkynthoh jong u Trump ka long ruh tang hadien katto- katne sngi ba u la pynbna ia ka khajna kaba 25% ia ki mar khaïi ba wanpoi na India. Nalor kata, u la pynpaw ruh ba ka US kan dang pynngat shuh-shuh ia kiwei ki kyndon pyrshah ia ka India hynrei um pat shym la pynpaw pyrthei ia kitei ki jingthmu jong u.
Hynrei ka US ka la iathuh lypa ba kitei ki khajna kiba ka US kan pynngat ia ka India, kin sa ktah jur ia ka ioh- ka kot jong ka India, lada ka India kam sangeh noh ia ka jingleit ai jingkyrshan ia ka khaïi- pateng jong ka Russia.
Ha ka taïew ba la leit, ki tyllong khubor na ka sorkar u Trump ki la ïathuh lypa ba ki kompeni umphniang jong ka ri India kin ym pynsangeh ïa ka jingpynpoi umphniang na Russia namar ba ka jingthied bor ding jong ka India ka dei kaba la pynlong da ki jingmyntoi jong ka ri bad ki bor jong ka ïew.
Kane ka jingbyrngem jong u Trump ka long hadien ka jingïadei kaba la nang sniew hadpeng ka US bad ka Russia namar ka jingbym lah ban mynjur ïa ka jingsangeh thma ha Ukraine. U la byrngem wat ban pynjari thymmai ia ka ioh- ka kot lada ym lah ban pyniaid ia ki jingiateh kumba la thmu.
Ka India, kaba dei ka ri kaba lai ha ka pyrthei kaba pynmih bun ia ka umphniang hadien jong ka China bad US, ha ka histori, ka la thied ïa ka umphniang jong ka na Middle East, hynrei kane ka la kylla hadien ba ka Russia ka la sdang ban die ïa ka umphniang jongka ha ka dor ba la pynduna hadien ba ki ri Sepngi ki la kyntait ban iatreilang badka, kum ka jingpynshitom namar ka jingleit hiar thma jongka pyrshah ïa ka Ukraine ha u bnai Rymphang jong u snem 2022.
Ha kajuh ka snem, u myntri kam bar ri u S Jaishankar u la iada ia ka rai jong ka India bad u la ong, “Ka jingthied umphniang baroh jong ka India na Russia ha ka shibnai ka long lehse kaba kham duna ban ia kaba ka Europe ka leh ha ka shisngi”. U la kren ha ka jingialang bad ki nongthoh khubor ha Washington.
Ha ka taïew ba la dep, u Trump u la pynbna ba ka jingiadie- iathied hapdeng ka India bad ka US ka la hiar bha mynta bad u la maham ruh ba un nang pyn tlor ia ka ioh- ka kot bad ka iew khaïi jong ka India lada kam kohnguh ne shah shkor ia ki jingmaham jong ka US.
