Shillong, Nailar 10
Ka kynhun ki ‘thei ïalehkai U-20 ka ri India ka la ïoh rung sha ka AFC U20 Women’s Asian Cup ha ka sien kaba nyngkong ha ki 20 snem, hadien ba ka la lah ban pynliem noh ïa ka Myanmar da 1-0 kol ha ka jingïakhun kaba khatduh jong ka Group-D ha ka sngi U Blei ha Thuwunna Stadium kaba ha Yangon.
Kane ka jinglah ban pynthikna ka la wan urlong lyngba ka shi kol ba la thep da ka Pooja ha ka minit kaba 27 bad ban pynlong ïa ka India ban bat ïa ka kyrdan ba hakhlieh ha katei ka group bad ban kamai 7 point na ki lai sien ïakhun. Kane ka kynhun ka la ïakhaid khlem don ba thep kol pyrshah ïa ka Indonesia (0-0) bad hadien ka la jop da 7-0 kol ïa ka Turkmenistan hashwa ba kan jop sa ïa ka Myanmar.
Kaba kham sngewtynnad hangne ka long ba ka ‘thei ap kol ka Jylla ka Ribansi Jamu ka la don lang hapoh kane ka thup, hynrei ka la hap ban shongben khlem da ïoh ïa ka lad ban mih madan.
Kumba ka paw naduh kaba sdang haduh kaba kut, ki ‘thei ïalehkai ka India ki la lah ban ïalehkai bha, katba ka Myanmar ka la hap ban ïashan ban pyllait n aka jingshah thep. Ka Neha bad ka Sibani Devi Nongmeikapam ki la ïasoh lang naduh ka minit kaba lai, hynrei kim shym la lah ban thep.
Ka Myanmar ka la sdang ka la pyrshang ban ïalehkai bha, hynrei tang hapoh shiteng kynta ka la shah thep kylla ha ka India lyngba ka Pooja. Kane ka shi kol ka la nangpynïoh mynsiem ïa ki ‘thei ïalehkai ka India na ka bynta ban bteng ha ka ban ïakhun tyngeh shuh shuh.
Hadien ba la bteng ïa ka jingïakhun jong ka kylla miet, ka Myanmar kaba la ïoh mynsiem lyngba ki paidbah nongkyrshan ka la thom naphang ha kaba ka ïoh ïa ka kabu kaba biang lyngba ka Su Su Khin, hynrei ka ‘thei apkol ka India ka Monalisha Devi ka la lah ban pyllait na ka jingshah thep ha ka minit kaba 48.
Haduh kaba kut ka Myanmar kam shym la lah ban pynphai bad ka la pynlong ïa ka India ban khur syndon ïa ka jingjop.
Halor kane ka jingjop, ka All India Football Federation (AIFF) ka la pynbna da ka song pisa kaba USD 25,000 na ka bynta ka jinglah ban pynurlong kane ka kynhun ïalehkai
Kumba ka paw ka India ka la ïoh rung khatduh sha ka AFC U-20 Women’s Asian Cup ha u snem 2006.
