Nongpoh, Nailar 10
Ha kawei ka jingjia ïatyngkhuh kali ha ki thaiñ Ri Bhoi Sepngi, uwei u samla uba dang khatkhyndai snem ka rta na ka shnong Barigaon u la duh ei ïa la ka jong ka jingim hadien ba la suba jur ba u la ïatyngkhuh bad kawei ka trok kaba don ïa u registration number AS25-FC-1660.
Katkum ka tyllong khubor ba la ïoh lum na ki bor pulit, la ïathuh ba katei ka jingjia ka dei kaba la jia ha ka por 2 baje mynstep katba utei u samla, uba la tip kyrteng kum u Giten Patho u dang wan na ka jylla Assam ban leit sha ka shnong lajong, kata ka Barigaon lyngba kawei ka arshaka (scooty) kaba don ïa u registration number AS25-Z-9834.
La ïathuh ba dei ynda utei u samla u la poi ha ki bynta jong ka shnong Iewsohksang ba u la ngat ha katei ka jingjia bad katei ka trok kaba suba donkti halor kane ka jingjia, kala phet bak na katei ka jaka bad la ïoh pat ban bat kham hadien da ki pulit ka thanad Byrnihat.
Na ka liang ki pulit ki la pynkit noh ïa utei u samla sha Patharkhmah CHC na ka bynta ban pynïoh ïa ka jingsumar, hynrei ki bor katei ka jaka ai jingsumar, ki la pynbna ba utei u samla u la dep khlad lypa. Kumta hadien ba la pyndep ïa ki jingdonkam katkum ki kyndon aiñ, la aiti noh ïa ka met kaba sah jong utei u samla sha ki bahaïing bad ka jingtohkit halor kane ka jingjia, ka dang ïaid shakhmat.
