Nongstoiñ, Nailar 10
Ka Hynñiewtrep Youth Council (HYC) Lai Lyngdoh Circle hapoh ka jingïalam u President samla Wandap Marwein bad General Secretary samla Willbirthson Khar-syiemlieh ryngkat ki dkhot ha ka sngi Saitjaiñ jong ka taïew ba la lah, ka la hiar sha ka jingkieng Mawthung-kper (Kynroh) ban pynkhuid ban pynbiang ïa ka, bad ban ailad noh ïa ki kali ban ïaid lyngba kane ka jingkieng.
Lah ban kdew hangne ba ka HYC ha ka 4 tarik u bnai Nailar, 2025 ka la buh por shitaïew ïa kane ka Company tier-1 ban plie noh ïa kane ka jingkieng, bad ka seng ka la dep ruh ban ïakynduh ïa u Executive Engineer halor kane ka kam.
Haba kren sha ki lad pathai khubor, u samla Willbirtson Kharsyiemlieh, General Secretary ka HYC Lai Lyngdoh Circle u la ong ba ha katei ka sngi la don ryngkat ruh ki briew jong ka Company tier-1 kata u Structure Engineer bad u Supervisor bad na ka liang jong ka kompani ki la kohnguh ïa ka jingdawa ka seng bad ki la pynshai ruh ban ailad tang ïa ki kali kiba kit hapoh 30 ne 35 ton eiei ban ïaid lyngba kane ka jingkieng.
Shuh shuh u la ong ruh ba ka seng ka la mynjur halor kane bad ka la kyrpad ruh ïa baroh kiba pyndonkam ïa kane ka jingkieng ban burom ïa kata namar kane ka lynti ïaid kam pat da biang shispah per cent na ka daw jong ka aiom lyiur ba dang jur slap.
U President samla Wandap Marwein pat u la ong ba ka jingsuki ban pyntrei ïa katei ka jingkieng ka long namar ba kane ka kompani kam shym la siew ïa ki bai wai jaka bad kam shym la pynbiang ïa ki bill jong kita kiba dei ban ïoh bad watla katta ruh ki briew jong ka kompani ki la batai ba 90% kane ka jingkieng ka la long ban pyndonkam.
Shuh shuh ka seng ka la kyrpad ruh ïa ki bor ba halor ban tuklar lem halor kane ka bynta namar ka jingbym lah ban pyndonkam noh ïa kane ka jingkieng ka ktah shibun eh ïa ki paidbah jong kane ka thaiñ.
