Nongstoiñ, Nailar10
Ka kynhun jong ka West Khasi Hills District Village Employment Council Association (WKHDVECA) ha ka jingïalam u R.G. Momin, MLA 33-Rambrai Jyrngam Assembly bad u Bah Lurshai Kharbani, MDC KHADC da ka jingsngewkhia ha ka 7 tarik u Nailar, 2025 ka la ïoh ban ïakynduh ïa u Myntri ka Community & Rural Development, u A.T. Mondal, halor ki mat ki jura jong ka jingïakynduh jingeh jong ki shnong ha kaba ïadei bad ka jingpyntreikam ïa ka skhim MGNREGA lane ka jingtrei 100 sngi.
Ka kyrwoh khubor na ka Association, ka la ong ruh ba ki mat ba kongsan kiba la ïoh ban ïakren ki long ka jingeh jong ki ‘Vendor’, ki nongkitkam jong ka VEC halor ka jingpynslem ïa ka ban siew ïa ka bai ‘Material Bill’ kaba la sah kut da ki snem, kaba la pyntlot ban treikam bad haduh ba ki ‘Vendor kim lah shuh ban kyrshan na ka daw jong ka jingdap ram ha ki dukan, ka bai thied tiar kum ki maw ki shyiap bad kiwei-kiwei.
Kane ka la wanrah shisha ïa ka jingeh kaba khraw ban pyndep ïa ki projek jong ki jingtrei bapher-bapher hapoh ki shnong.
Ki la pynpaw ruh ba haba kheiñ lang, ïa ka jingsahkut jong ka pisa ba tang hapoh jong ka West Khasi Hills District kaba don ïa 5 tylli ki Block kynthup lang ïa ki Block kiba dang thymmai, ka la poi sha palat T.23 klur tam haduh mynta, ha kaba kane ka la wanrah jingeh bad ka la pynartatien ruh haduh lano kane ka Sorkar kan lah ban siew ïa katei ka pisa ba dang sah sha ki ‘Vendor’.
Nangta, ki la ong ruh ba ha ka jingïakren, u Myntri ba dei khmih u la pyntip ba na ka liang ka Sorkar kam shem la pynslem ban phah ïa ka pisa sha ki distrik bad kumjuh sha ki Block, hynrei ka dei na ka daw jong ka jingphah slem na ka Sorkar Pdeng.
La ïathuh ruh ba ka ïoh ban ïakren ruh ha kaba ïadei bad ka jingeh jong ki nongbat ïa ka kam ba kin hap ban shondur arsien shisngi ban lah ban ‘upload’ ïa ka ‘attendance’ lane ba yn lah ban ban siew bai bylla, bad la ïakren sani bha ba kum ki VEC ki la mad jingeh shibun na ka daw ba kim don ki ‘mobile’ kiba biang, ka jingbym don ‘network’ ha ki katto-katne ki jaka trei, ka jingbym biang ka ‘Apps NMMS Application’ bad khamtam ba kane ka la shu pynbunkam shibun na bynta ki nongpeit kum ki Mate bad Secretary 100 sngi.
Ka kynhun ka la ïoh ban ïakren ruh ha kaba ïadei bad ka bai bylla sngi kaba long tang T.272 shi sngi, shikhlieh kynthei bad shynrang kaba long ka jingsiew bai bylla kaba rit bha.
Ha katei ka jingleit ïakynduh, na ka liang ka seng ka la buh ka jingkyrpad sha ka Sorkar ba kin pynkiew noh ïa ka bai bylla kaba dei katkum ka por bad ruh ban pynïahap katkum ka bai bylla ba la buh ka ka Sorkar Jylla namar ba kam ïahap shuh katkum ka dor bad ka por naba ka jingrem jong ki mar ki mata bad ki jongdonkam ha baroh ki liang.
Ka seng ka la kyrpad ruh sha u Myntri ba kin kham ai lad ban ym buh pyrkhih eh ïa ki jingtrei ba ki paidbah ki donkam ha ki shnong namarba ki la bun palat ki jingteh kyndon (Permissible Work) ba kin lah ban trei ïa shibun ki jongdonkam ha ki shnong kum ka kynroh bad jingker bad kiwei.
La ong ruh ba ka seng ka la ïoh ruh ban pynsngew sha u Myntri ha kaba ïadei bad ka jingmang pisa ha ki jingtrei (Estimate) ba na ka liang ka skhim MGNREGA ka long kaba rit shaba palat haba ïanujor bad kiwei ki tnad ban mang ban pynlut bad ban kynthup lang rung ïa ka bai maramot khnang ba ki jingtrei kin long kiba bit ba biang bha.
Halor kitei ki mat ba seng ka la ïoh ban ïakren, na ka liang jong u Bah J.T.S. Thongni uba long u nongïalam u la pyntip ba u Myntri u la pynpaw ba um shym la shongthait ban wad ki lad ki lynti, ban peit ïa ka jingbha jong ki paidbah.
Shuh shuh u la pynpaw ba ka skhim MGNREGA ka long u budlum ban ïarap ïa shibun ki shnong ban pynïoh ïa ki jingdonkam bad u Myntri u la pynpaw ruh ba ki briew ha ka konstitwensi jong u bad ha baroh kawei ka Jylla hi ki mad ïa kane ka jingeh na ka daw ba ka Sorkar Pdeng ka buh ïa kine ki rukom pyntreikam jong baroh ki skhim MGNREGA bad ba ka Sorkar Jylla kam da lah than ban tulklar halor kine ki jingpyntreikam.
