Mawkyrwat, Nailar 10
Ki pulit jong ka South West Khasi Hills District ryngkat ka jingïarap lang ki paidbah jong ki shnong khappud bad ka Bangladesh ha ka 10 tarik u Nailar, 2025 kaba dei ka step sngi U Blei ki la ïoh ban kem sa ïa uwei u runar na Bangladesh, uba don bynta lang ha ka kynhun kaba la hiar ban thombor ha ki shnong ha South West Khasi Hills.
Ïa une u briew la tip kyrteng kum u Mubarak Hussain uba na ka shnong Kalagaon Sonamganj ha Bangladesh.
Katkum ki tyllong khubor na u Superintendent of Police jong ka South West Khasi Hills District u Bah B Jyrwa u la ïathuh ba ïa utei u nong Bangladesh la ïoh kem ha ka step jong ka 10 tarik u Nailar, 2025 ha ka por kumba 7:00 eiei mynstep na ka shnong Gilagora ha South West Khasi Hills District.
Kum ban shu pynkynmaw ba ka kynhun pyntriem na Bangladesh kaba don kumba 8 haduh 9 ngut ha ka 8 tarik u Nailar, 2025 ki la thombor da kaba shoh pynmynsaw ïa uwei u nongshong shnong ka Rongdangai bad ki la synreit kuli ruh.
Ha kaba ïadei bad katei ka jingjia ki pulit ryngkat ki BSF ki la pynlong ïa ka jingthwet ban ïoh kem ïa katei ka kynhun pyntriem bad ha ka 9 tarik ki la ïoh ban kem ïa ki saw ngut kiba donkti ban thombor ïa u Balsrang Marak bad na katei ka kynhun la ïoh ban kurup ïa u sdie, ka tiar ot ïa ki waiar, kawei ka magazine pouch, kawei ka pistol rong ïong, screw driver, lai tylli ki mobile phone, 3 tylli ki tiar pynbthei, kawei ka lut sanspah, kawei ka police ID bad kiwei kiwei ki tiar.
Kumba long munta kiba la shah kem baroh ki long 5 ngut, ki pulit bad BSF haduh mynta ki dang pynlong ïa ka thwet ban ïoh kem sa ïa kiwei pat ki runar kiba dang lait phet.
Kumba long mynta, ki Pulit kila kem haduh 5 ngut na kine ki runar kiba la wan rung tuh ha ka sngi Thohdieng, bad pyrshang ban rahbor ïa uwei u nongshong shnong ka Rangdongai ba la tip kyrteng kum u Balsrang Marak.
Katkum ka jingïathuh ki pulit, kine ki runar kila wan kumba 8-9 ngut ban rung ha Rongdondai bad rahbor ïa u Balsrang hynrei une u rangbah u la ïoh ban phet na kti jong ki ha ka shnong New Rongdangdai bad leit rieh ha kawei ka ïing.
Kine ki runar kila leit tied ïa ka jingkhang jong kane ka ïing bad kila siat ruh katto katne kuli, kaba la pynlong ïa kane ka ïing ban plie ba kin rung. Kine ki runar kila shoh pynmynsaw ïa u Balsrang hashuwa ba kin phet na kane ka jaka.
