Jowai, Nailar 10
Ka jingbym ïohkam ïohjam ki samla ka dei ka jingeh kaba kane ka pateng mynta ka ïakynduh, hynrei ka soh kyrdot pat jong kane ka jingeh ka dei ka jingbym lah ka jong nga jong phi kum ki nongshong shnong.
Ïa kane la ong da u MDC ka War Central u Ma Jamshaphrang Pohtam ha ka ‘Youth Workshop Programme’ ba la pynlong da ka Sohkha Mission Village Durbar lyngba ka jingkyrshan ka ophis u Deputy Commissioner (Planning), West Jaiñtia Hills District hapoh ka Chief Minister’s Youth Development Scheme jong u snem 2023-2024.
Ïa kane ka workshop ba shisngi ba la pynlong ha Community Hall ka shnong ha ka 8 tarik Nailar ha ka jingdonlang ka Secretary Meghalaya International Chambers of Commerce ka Kong D Khonglah bad ka riew shemphang ka Kong SD Shylla kaba dei ka District Tourism Officer ka West Jaiñtia Hills District.
Haba bteng ïa ka jingkren, u Ma Jamshaphrang u la ong, ym lah ban len ha kine ki sngi bun bah na ki samla pule ha ka jylla ki hap ban mad ïa ki jingeh jingjynjar jong ka jingkyrduh kam kyrduh jam bad bun ruh na ki samla kiba la pyndep ïa ki kyrdan bad lain pule bapher bapher ki hap ban shong khlem kam khlem jam.
Haba bynrap u Ma Pohtam u la ong, ym lah pat ban len ba dang bun ki kam ki jam ba la hap ban wan trei da ki bar jylla, bad ka daw ka long ba bun na ki samla ka jylla ki dang lehrain ban trei ïa ki kam kiba kham poh namar ba ki don ka jingsngew ba ka kyrdan kaba ki pule kam ïahap shuh ïa ki kam barit baria, hynrei kim pyrkhat ba da kaba trei ïa ki kam rit kam ria ka long kawei na ki lad ban aikam ïa ki ba kin lah ban ïeng ha la ki jong ki kjat.
U Ma Pohtam u la kyntu ruh ïa ki khun samla ban long kiba shlur bad don ka mynsiem ban trei ha kino kino ki jait kam kiba lah ban kyntiew ïa ki ha ka ïoh kam ïoh jam bad ba kan long ruh ka lad ban khanglad ïa ki mynder kiba thmu ban wan rung sha ka jylla.
Ïa ka jingïalang la pynïaid da u Chairman Ma VL Gadew bad la ïoh ka jingkren lyngkot na u waheh shnong Ma PS Suchen kumjuh ki kyntien khublei na u Ma M Manner, General Secretary.
Hadien ka jingïalang, ka riew shemphang ka Kong SD Shylla, District Tourism Officer ka West Jaiñtia Hills District kala batai bniah ïa ki samla halor ka kam jngohkai pyrthei bad ki lad ïoh kam ïoh jam ban ïeng ha la ki jong ki kjat.
