Ki shnong ka Meghalaya kiba don ha khappud bad ka Ri Bangladesh, la ju sakhi ba kim ju kham don ha ka shongsuk shong shngaiñ hynrei ban don beit ha ka jingma ym na kino-kino ki kam sniew na ki briew lajong hynrei na ki nongshong shnong jong ka Ri Bangladesh. Ngi sakhi ba ki briew na Bangladesh kim ju don satia kata ka jingtieng ne sheptieng hynrei ban wan kiew sha ki shnong jong ka jylla Meghalaya bad ban pynïaid shakhmat ïa ki kam tuh, lute ne thombor ïa ki nongshong shnong. Kum kine ki jingjia ki la jia na kawei ka por sha kawei pat. Kum ki nongshong shnong kiba sah ha ki shnong khappud bad ka Bangladesh, ki im hapdeng ka jingshong syier ym tang ha ki ïing ki sem hynrei wat haba leit sha ki lyngkha ki pynthor ban pyndep ïa ka rep ka riang.
Dang ha kine ki sngi, ngi la sakhi ïa ka jingwan kiew jong ka kynhun ki runar na ri Bangladesh kiba wan haduh kumba 9 ngut ei-ei, kiba la leit ban thombor ha ka shnong Rongdangdai ha South West Khasi Hills bad pyrshang ruh ban rahbor ïa uwei u nongshong shnong. Kane ka jingthmu ka la pulom noh namar ka jingïoh lad jong u rangbah ban phet na kti jong ki. Halor kane, ki pulit ryngkat ki shipai BSF bad ki nongshong shnong ki la trei shitom bad ha kaba la ïoh ban kem noh ïa ki 5 ngut ki briew na Bangladesh kiba la wan thombor ha katei ka shnong.
Kane kam dei shuh ka jingjia kaba thymmai. Ngi la sakhi na kawei ka por sha kawei pat, ha ki bynta bapher-bapher la ka dei ha ri lum Jaiñtia ne wat sha ri lum Garo, ki shnong kiba don markhap bad ka Bangladesh, kim shngaiñ satia khamtam lei kito ki shnong khappud, ha kaba ka jingrung jingmih ka long laitlan ne ka bym pat don jingker sainar. Ngi ju sakhi ba ym tang ba ki briew na Bangladesh, ki wan kiew ban lute na ki ïing briew hynrei ban tuh ruh ïa ki jingthung jingtep na ki bri khamtam kum u kwai, tympew, ki soh bad kiwei-kiwei, ka jingwan kiew ban tuh maw, shyiap na ki wah bad bun bah kiwei pat ki kam tuh ba ki ju pynïaid shakhmat. Ngi lah ban sngewthuh ba kawei na ki daw ba ka la pynlong ïa kine ki briew ban shlur ban wan kiew ka dei namar ka jingban palat ka jingduk ha ki shnong jong ki. Ki kloi ban leit bylla ne trei kat sha ba ki ïoh watla ka dei ha ka jingsiew ka barit bha ruh, kim salia satia, namar ka jingdawa ka kpoh.
Na uwei u snem sha u wei pat, la ju ïohi ba ka Sorkar ka la ïaleh ban pynïaid shaid-shaid ïa ka jingker sainar ha shilynter jong ka khappud hynrei imat kane ruh kam pat biang. Dang shen u Myntri Rangbah ka Jylla u Conrad K Sangma u la ong ba ka Sorkar Meghalaya ka la pynkhreh ban pynsted noh ïa ka jingker sainar ha khappud jong ka ri India bad Bangladesh, hadien ba la dep ban ïapynbeit ïa ka jing-sngewkhia kaba la pynpaw da ki bor pynïaid shnong.U Conrad ula pyntip ba kumba 80-90% jong ka thaiñ khappud kadei kaba la dep ban ker sainar katba kaba dang sah ban ker sainar ka long sa 40-44 kilomitar. Katkum ka jingong ka jong u, kumba 400 kilomitar jong ka khappud la dep ban ker sainar bad ki kam ki dang ïaid shakhmat ban ïoh pyndep noh ïa ki jaka kiba dang sahteng.
Watla ngi don ki bor pahara ha ka liang ki BSF hynrei ngi ju shem pat jan man ka por la ju ïoh kem ïa ki briew kiba wan rung na ki bynta ka Sor Shillong ne wat na kiwei-kiwei ki bynta ymdei shuh tang na khappud. Ka jingkylli ka long ba kumno kine ki briew ki ïoh rung suk. Hato don ki nongïarap kiba kloi ban pynrung haba ïoh jingmyntoi shimet khlem da pyrkhat shuh ïa kaei pat ka ban jia hadien. Kumba ka paw mynta, kum ki nongshong shnong ha khappud ki dei ban long kiba husiar bad peitngor bha khamtam lei haba ïohi ïa ki dur thymmai dei ban pyntip mar-mar sha ki bor ka aiñ.
