Nongstoiñ, Nailar 10
Ka kynhun ïalehkai jong ka Men Legends Group (MLG-B) na Nongstoiñ ka la long ka lahduh ha ka lympung ïalehkai phutbol ba la tip kum ka Knockout Football Tournament 2025 ba la pynlong da ka Mawkadiang Sports Social Welfare & Cultural Organisation.
Katei ka nam jop ka la wan hadien ba ka la pynliem noh ïa ka Galaxy United FC da 1-0 kol ha ka jingïalehkai final kaba la long ha ka sngi Saitjaiñ ha madan Mawkadiang West Khasi Hills .
Haba phai sha katei ka jingïakhun final hapdeng kine ki ar tylli ki kynhun ka la long shisha ka jingïalehkai kaba itynnad bad kaba ïakhaid bha bad ïa kane la sakhi haduh bakut noh jong ka kylla miet ym shym ka don mano mano ba ïoh ban pynkhih jar. Hynrei dei ha ka ‘extra time’ ba na ka liang ka MLG- B ka la ïoh ban thep shi kol bad pynlong syndon ban khur ïa ka jingjop.
Ha katei ka sngi la ïadon lang u MLA ka Nongstoiñ u Bah Gabriel Wahlang kum u kongsan ha ka jingdonlang ruh u sordar ka shnong Mawkadiang West Khasi Hills u Bah Paisingh Puweiñ, ki dkhot ka Executive Committee, ki rangbah jong ka shnong, u President ka klob u Bah Goldiningstar Marweiñ bad kiwei kiwei kiba la sam ruh ïa ki khusnam kaba long da ka pisa ha ryngkat ki trophy.
