Shillong, Nailar 09
U General Secretary ba thymmai jong ka United Democratic Party (UDP) Bah Titos Chyne u la ong ba ka seng haduh mynta kam pat ïakren ïa kam ban bujli Myntri ha ka Sorkar MDA-2.
U la ïathuh ba haduh mynta ym pat don ba wan pynsngew sha ki nongïalam ka UDP lada dei da ka jingthoh ne da ka ktien ban kwah bujli Myntri na ka bhah UDP ha ka Sorkar MDA-2.
Lah ban kdew ba ka UDP kaba ïatreilang ha ka Sorkar MDA-2 na ki 12 ngut ki MLA kiba ka don, ar ngut ki la ïoh ïa ka shuki Myntri ha ka Sorkar bad kine ki long u Bah Paul Lyngdoh bad u Bah Kyrmen Shylla.
Haba kylli la ka don ne em ka jingdawa na ki nongkitkam na West Jaiñtia Hills ban bujli noh ïa u Bah Kyrmen Shylla, u MLA ka Khliehriat sha u Bah Lahkmen Rymbui ne sha u Bah Nujorki Sungoh u MLA na Mowkaiaw, u Bah Titos u la ong ba haduh mynta ym pat don kum kata.
U la ïathuh ba ha ka CEC la don kiba buh jingkylli hynrei ym shym la ïakren ïa kane ka mat namar ka dei ka kam jong ki MLA.
U Bah Titos Chyne uba dei MLA barim ka Sohra constituency bad MDC ba mynta ka Sohra u bat ruh kum u President ka UDP East Khasi Hills hynrei ïa kane ka shuki u lah ban iehnoh ynda la wan ka jingpynthymmai nongkitkam namar u la bat kum u General Secretary ka UDP Sengkmie.
U Bah Titos Chyne u bat ruh kum u Vice President ka UDP Sengkmie shwa ban shah jied kum u General Secretary hadien ka jingiehnohkam syndet u Bah Jemino Mawthoh.
Kum ban shu pynkynmaw ha kine ki sngi ka la mih ka jingïakren na ki nongkyrshan ka UDP West Jaiñtia Hills ban leit pynpaw ha u President ka UDP Bah Metbah Lyngdoh ban bujli Myntri ïa u Bah Kyrmen Shylla ban pynrung ïa u Bah Lahkmen Rymbui ne Bah Nujorki Sungoh kiba dei ki MLA kiba la jop arsien.
