Shillong, Nailar 10
U President ka Khasi Student Union (KSU) Sengkmie u Bah Lambokstarwell Marngar u la ong ba ki dkhot ka seng kin bteng beit ban khynra ïa ki mynder ri bad bar jylla kiba wan sha ka jylla Meghalaya namar ka Sorkar Jylla kam shym la pyntreikam ïa ka aiñ kaba la dep mynjur kaba dei ka Meghalaya Residents Safety & Security Act 2016.
Haba ïakren bad u Bah Lambokstarwell Marngar u la ong haba ka Sorkar India kam pat lah ban pyntreikam ïa ka ILP hadien ba ka ïingdorbar thawaiñ ka la mynjur, kumta ka dei ban pyntreikam noh da ka MRSSA 2016 hynrei haduh mynta ka Sorkar kam pat leh eiei ban pynïeng ïa ki khyrdop ban talasi ïa ka jingrung ki bar jylla sha ka jylla Meghalaya.
U la ong ba la bunsien ka seng ka la pynkynmaw ïa ka Sorkar Jylla ban pyntreikam ïa ka MRSSA hynrei kam shym la patiaw kumta ka seng kan bteng beit ban khynra ïa ki bar jylla kiba wan shapoh ka jylla.
“Lada ka dang dei ka ‘Bill’ ngi lah ban leit kylli na ka Sorkar balei kam lah ban pynïeng ïa ki khyrdop talasi hynrei ka la dei ka aiñ, ka la dei beit ka kamram jong ka Sorkar ban pyntreikam,” u la ong.
Shuh shuh u la ong ba kane ka aiñ kam shym la treikam tang ïa kiba wan na kiwei ki jylla hynrei ka treikam ïa kiba wan na kiwei ki ri ruh kiba marjan.
U la pynpaw ba ka jingwan rung ki runar na Bangladesh kumba phra ngut sha ki thaiñ ha South West Khasi Hills District ka la dei lypa ka jingmaham ïa ka Sorkar Jylla ba kam dei ban leh sting ïa ka jingrung kiwei ki bar jylla ne mynder ri sha ka jylla.
U Bah Lambokstarwell u la ong biang ba wat ka Sorkar India ka la bthah ïa ki Sorkar Jylla ban khynra ïa ki mynder ri kiba dei ki nong Bangladesh kiba sah be-aiñ sha ki jylla ka thaiñ shatei lam-mihngi hynrei ïa kane ruh ka Sorkar Jylla ka sngap jar jar.
