Gaza, Nailar:
Ka kynhun myntri jong ka tnat ïada ri jong ka Israel, ka la mynjur ïa ka jingthmu jong ki shipai ïada ri jong ka Israel (Israeli Defense Forces -IDF), ba kin ïoh ban synshar ïa ka nongbah Gaza, da ka thong ban jop ïa ka Hamas bad ban pynthikna ban pyllait ïa ki nongshah rahbor.
Kane ka jingthmu ka Israel la paw lyngba ka jingthoh jong u Myntri Rangbahduh u Netanyahu ha ka rynsan X ha kaba u la ong “ngim leit ban knieh ïa ka Gaza – ngi leit ban pynlait ïa ka Gaza na ka Hamas”.
Kane ka jingthmu la pynshong nongrim ha ki 5 bynta, pynduh noh ïa ka Hamas na ka bor bad pynpra ïa ka bor shipai jong ka, pynthikna ban pyllait ïa baroh ki nongshah rahbor, kiba im bad kiba ïap kumjuh, pynthikna ruh ba ka Gaza kan shah pynduh shipai bad khanglad ïa ka Hamas ban ïalum biang. Ka Israel kan pynneh ïa ka jingsynshar halor ka jingshngaiñ ha Gaza. Pynlong ïa ka jingsynshar riew paidbah kaba thymmai ha Gaza ka bym don jingïadei bad ka Hamas ne ka bor synshar Palestine.
Kane ka jingthmu ka la shah kynthoh na ki nongïalam jong ka pyrthei, kynthup ïa u Secretary-General jong ka United Nations, u Antonio Guterres, uba la khot ïa kane ka “kane kan wanrah ka jingma kaba jur”. Ka Germany ka la pynsangeh noh ïa ka jingshalan ïa ki tiar shipai sha Israel, da kaba pynpaw ïa ka jingsngewkhia halor ka jinglah ban pyndonkam ïa ki ha Gaza.
Ka UN kan ïakynduh ha ka sngi U Blei ban ïakren ïa katei ka jingthmu, bad ym pat lah ban tip lano kan jia ka jingshimti ïa ka nongbah Gaza. Ki shipai Israel, ki la sdang ban pynkhreh ban pyntreikam ïa kane ka jingthmu, hynrei ka por bad ki jingtip ba bniah jong katei ka jing pyntreikam, ki dang sahteng.
