Shillong, Nailar 10
Ka North East Telecom Circle ka la kynjoh biang sha ka thong ha ka jingdon kiba pyndonkam ïa ka ‘5G Fixed Wireless Access’ (FWA), namar mynta ka la kot sha ka 65,000 ngut kiba la pynïasoh katkum ka kaiphod kaba dang shen jong ka Telecom Regulatory Authority of India (TRAI) na bynta u bnai Jylliew, 2025.
“Kane ka thaiñ ka la bynrap shuh sa 3,000 ngut kiba pyndonkam ïa ka FWA tang hapdeng ka shibnai kaba la pynkiew ïa ka jingdon ki nongpyndonkam, kata na ka 62,157 ngut ha u bnai Jymmang sha ka 65,196 ngut ha u bnai Jylliew,” ong ka kyrwoh.
Ka kyrwoh ka ong ruh ba kane ka jinglah ban nang kiew ka dei lyngba ka jinglamkhmat da ka ‘JioAirFiber’, kaba dang bteng ban pynkylladur ha ka liang ka jingïoh lad ban pyndonkam ïa ki kor ki bor ha kylleng ki jaka kiba kham sha kyndong kynshrot bad kiba long lum long riat ha kane ka Thaiñ Shatei Lam Mihngi.
Ka ‘JioAirFiber’ ka la pynlah ïa kiba don ha la ïing, kiba treikam lajong barit-baria, bad ki jaka pule ban ïoh mad ïa ka kor ‘internet’ kaba khlaiñ bad kaba sted.
Ka North East Telecom Circle kaba kynthup ïa ka Arunachal Pradesh, Manipur, Meghalaya, Mizoram, Nagaland, bad Tripura – ka la sakhi ïa ka jingkiew sted ha ka liang ka jingpynïasoh lyngba ki kor ki bor. Da ka jingnang kiew ka 5G FWA, k thaiñ ruh kaa nang kham jam ban weng ïa ki jingïakynduh jingeh kiba don baroh shikatta lyngba ka jingïoh ïa kor ‘internet’ kaba sted.
Shuh shuh ki paidbah ha kylleng ka dong ka thaiñ ha kine ki Jylla ki ïoh ïa ka jingpynïasoh kaba kham bha bad ïoh ruh ban kmen ïa ki jingmyntoi jong ki kor ki bor ha ka jingim kaba man ka sngi.
Namarba ka jingpyndonkam ïa ka 5G FWA ka la nang kiew ha ka ri baroh kawei, ka Thaiñ Shatei Lam Mihngi ruh ka ïaid ha ka jingkiew kaba suki bad ïai bteng.
Ka jingnang bun ki nongpyndonkam ha kane ka thaiñ ka pyni shai ba ka don ka jingdawa ban ïoh ïa ka jingpynïasoh kaba lah ban shaniah ha kane juk thymmai wat ha ki katto-katne ki jaka ha India kiba don kham sha kyndong eh.
