Shillong Nailar 10
Ka National People’s Youth Front (NPYF) Shillong City ha ka sngi saitjaiñ ka 09 tarik u Nailar 2025 ka la pynlong ïa ka jingïalang pynkup burom ïa ki samla kiba pass bha ha ka SSLC bad kumjuh ruh ha ka HSSLC.
Ha kane ka sngi ka Myntri ba dei peit ïa ka tnad ka koit ka khiah ka Sorkar Jylla ka Dr. Ampareen Lyngdoh ka la long kum ka Kongsan nangta u Working President ka NPP u Bah Hamletson Dohling kum u Symbud Kongsan bad kumjuh u Nongai ktien ka party u Bah H.M.Shangpliang, nalor ki nongïalam jong ka NPYF.
Kane ka jingsam khusnam kadei beit thik tang ïa ki samla kiba dei na ki konstitwensi jong ka Shillong City bad la shim beit tang ïa kiba ïoh haduh 80 per cent shajrong ha ka klass 10 bad ka kla 12.
La wan ban pynshongkun ïa ka jingïalang naduh ki Kmie ki Kpa bad ki bahaïing ha sem jong ki samla pule.
Watla ka dei ka sien kaba nyngkong ba ka NPYF ka pynlong ïa kane ka prokram hynrei ki la don palat 70 ngut ki samla kiba la shah pynkup burom ha kane ka sngi.
Haba ai jingkren ha kane ka sngi na ka liang ka Kong Ampareen Lyngdoh kala ong ba ki samla kidei ban kynmaw ba khlem ka saiñ pyrthei kan ym don jingim. Ka la ong ba lyngba ka saiñ pyrthei ka sa don ka jaka pule puthi, ka jingïadie ïa thied, bad kano kano kaba ngi shem ha ka jingim.
Shuh shuh ka la ïathuh ba ka sorkar MDA-1 bad MDA-2 ka la wanrah shibun ki kam pynroi la ka long ha ki jaka pule ïa ka jinglah ban pynïoh ïa ka Engineer College, ka State University, ban buh ïa ka State Medical College.
“Ryngkat ka saiñ pyrthei ka sa don ka jinglah ban shakri ïa u paidbah bad ka thong jong ka sorkar ruh ka long ban shakri ïa u paidbah. Lada ki samla ki lah ban ai biang ka jingkyrshan ïa ka NPP kin sa ïohi ïa shibun ki jingkylla ha kiba bun ki liang” la ong ka Kong Ampareen.
Ka Myntri ka la ong ba dei tang kito kiba treishitom kiba lah shisha ban poi sha ka thong ha ka jingim. Kumta ka la kyntu ruh ïa ki samla pule ba kin long kiba peitngor na ka jingshah pynngop ha ki shangkhawiah jong u drok.
Na ka liang u Bah Hamlet pat ula ong ba ha kane ka juk watla ki don bun ki samla pule kiba la pass bha hynrei ki dang duna pat ki samla kiba ïoh ban bat ïa ki kam kiba heh ha ka sorkar. Hynrei u ong ba dei ha kine ki khyndiat snem ba ula ïohi ba ki samla pule ka jylla ki la kham kiew da kaba peit na ka jingpass bha ha eksam kaba long ka jingkyrmen ïa ka jylla.
