Shillong, Nailar 10
Ka lympung ïalehkai 9th East Khasi Hills District Open Badminton Championship 2025 ba la pynïaid da ka East Khasi Hills District Badminton Association (EKHDBA) ka la poi sha kaba kut ha ka sngi Saitjaiñ ha JN Indoor Stadium, Polo.
Ha kane ka lympung ïalehkai kaba la neh lai sngi kynthih, la wan shim bynta da 103 ngut ki khynnah ha ki kyrdan ïalehkai bapher bapher kiba kynthup naduh ka Under-13, Under-15, Under-17, Under-19 bad Senior ha ka Singles, Doubles bad Mixed Doubles.
Ka jingthmu jong ka jingpynlong ïa kane ka lympung ka long ban pynshlur ïa ki khynnah ba kin ïashim bynta ha kane ka jingïalehkai badminton.
Ha katei ka sngi kaba khatduh la ïadon lang u Dr. C.O Rangad, Senior Vice President ka Megha-laya State Badminton Association (MSBA) bad uba long u Adviser jong ka EKHDBA, kum u kongsan ha ryngkat ka jingdon lang u Bah P.Laloo Vice President ka MSBA, Rajesh Kamal General Secretary ka MSBA, Bah T.Diengngan President ka WKHDBA, Bah S. Massar, Kong Pondora Rapsang President ka EKHDBA lem bad kiwei pat ki dkhot ka EKHDBA.
Ïa ka nam lahduh ha ka Under-13 Singles la khur da ka Lateisha Nongtraw bad u Maywell Pyngrope. Ha ka U-15 Singles la rah da ka Inrity Nongtraw bad u Haegan Diengdoh, katba ha ka Boys Doubles la rah da u Maywell Pyngrope bad u Haegan Diengdoh.
Ha ka U-17 Singles la rah da ka Netania T Tariang bad u Gavin Kharbuki. Ha ka U-19 Singles la rah da ka Pratiksha Joshi bad u Gavin Kharbuki. Ha ka Junior Mixed Doubles la rah da u Raynell Kharbuki bad ka Pratiksha Joshi.
Ha ka Women Singles la rah da ka Elsarica Umdor, katba ka ‘thei ïalehkai ka la khur ruh ï aka jingjop ha ka Women Doubles ryngkat bad ka Pretty Singh. Ha ka Men’s Singles la rah da u Gaurav Singh hadien ba u la jop ïa u Benhanan Kharwanlang ha ka final, katba ha ka Men’s Doubles la jop da u Kiefer W Shullai bad u Benhanan Kharwanlang.
U Benhanan u la khur ruh ïa ka nam lahduh ha ka Mixed Doubles ryngkat bad ka Elsarica Umdor, kiba la jop ïa u Dwigbijoy Churchung bad ka Christine J Ch Momin.
