Shillong, Nailar 10
Ka Meghalaya Athletics Association (MAA) ka la sdang ïa ka prokram ai jinghikai ne ka High Performance Camp ha ka sngi U Blei ha SAI Training Centre, Shillong.
Ha kane ka sngi la ïadon lang ki khlur ïalehkai Olympic barim na Australia kata u Ian Campbell, Director ka High Performance Sportality lem bad ka Glynis Nunn, kaba la khur ïa ka takma ksiar ha ka Los Angeles Olympic 1984 bad kaba long ruh ka coach jong ka World Athletics “Level 5” bad Director ka Gold Coast Academy of Sport, kum-juh ki nongïalam ka Meghalaya State Olympic Association (MSOA) kata Bah John F. Kharshiing, Bah E.M.H Passah, Vice President, Bah DD. Ryntathiang, Vice President, kumjuh ki athletics coach jong ka tnat ïalehkai kata ka Kong Daisy Marweiñ, Bah Pleasantly Synnah bad kiwei kiwei.
Ha kane ka prokram ka ban neh haduh san sngi lynter la wan shah hikai da 66 ngut ki khynnah ïalehkai kiba 16 snem shaneng bad kane ka long shi bynta ban pynkhreh ïa ka 39th National Games ka ban long ha u 2027 ha ka jylla Meghalaya.
Ka jingwan shah hikai kitei ki khynnah ka long hadien ba ka MAA ka la dep ban pynlong dangshen ïa ka ‘selection trial’ ha Wahïajer, Shillong bad ha Tura na ka bynta ban ïoh ïa ki khynnah kiba kynsai na kylleng ki district jong ka Jylla.
Watla kane ka High Perfor-mance Camp kan dei tang san sngi, hynrei kan long ka jingmyntoi kaba khraw na ki bynta ki khynnah ïalehkai ba kin ïoh ïa ki buid ïalehkai bad ruh ba kin danglah ban bteng ïa kiwei pat ki prokram ai jinghikai kiba katei ka synjuk kan dangpynkhreh nangne shakhmat khnang ba ki lah ban ïoh ïa ka lad ban shim bynta ha ka National Games ka ban long ha kane ka Jylla.
