Nongstoiñ, Nailar 11
U Superintendent of Police ka West Khasi Hills District BD Marak, MPS, u la pyntip ba ha ka 16 tarik u Naitung 2021, la ïoh pdiang ka ejahar pyrshah ïa u Kitborlang Shangrit ba u la thombor bad leh be-ijot pyrshah ïa kawei ka khynnah rit.
Ha ka kyrwoh khubor, u SP u la ong ruh ba halor kane ka jingjia la ujor mukotduma pyrshah ïa une u nongleh runar hapoh ka ka thanad Nongstoiñ, Case No. 46(7)2021 hapoh ka kyndon 5(1)/6 jong ka aiñ POCSO bad la aiti ïa ka jingtohkit sha ka WPSI L Shangshai jong ka Nongstoiñ Women Police Station na ka bynta ban tohkit bniah.
Shuh shuh u la ong ruh ba hadien ba la pyndep ïa ka jingtohkit, la thoh ïa ka kot jingmudui bad la phah sha ka ïingkashari jong u Nongbishar Kyrpang (POCSO), Nongstoiñ, ban shim bishar ïa ka kam.
Kumta, ha ka 31 tarik u Naitung 2025, ka ïingkashari lyngba u Nongbishar Kyrpang (POCSO), Nongstoiñ, hadien ba ka la bishar bniah ïa ki sakhi kiba la pyni ha ka jingtohkit bad ha ka jingbishar, ka la pynmih rai pyrshah ïa u Kitborlang Shangrit kata da kaba set phatok haduh arphew snem kyntih, ryngkat ka kuna kaba 30000 hajar tyngka bad lada jia ba um lah ban siew ïa katei ka kuna ha ka por ba la buh yn sa pynjlan biang ïa ka jingset phatok sa hynriew bnai kaba hap hapoh ka kyndon 5(1)/6 jong ka aiñ POCSO.
