Agartala, Nailar:
U Myntri Rangbah ka Tripura, u Manik Saha, hynnin ka sngi, u la ong ba u la pynpaw biang ba ka jingïakhih ‘Har Ghar Tiranga’ ka ïeng kum ka jingai burom kaba sngewrit ïa ki mynsiem kiba shlur kiba la leh ïa ka jingaiti kaba khraw tam ban ïada ïa ka jinglong trai jong ka ri.
Haba ïashim bynta ha ka jingïalap paidbah shaman ki thliew ïing hapoh kane ka jingthmu ha Baradowali Assembly Constituency, u Saha u la pynpaw ïa ka jingsngewkmen halor ka jingkynthoh palat jong ki paidbah ha Tripura.
“Kane ka dei ka snem kaba lai lynter jong ka ‘Har Ghar Tiranga’ hadien ka jingkhot jong u Myntri Rangbahduh ka ri u Narendra Modi ïa ka ri. Ka lama ka ri jong ngi ka dei ka jingsarong jong ngi, bad kane ka prokram ka dei ka lad jong ngi ban ai burom ïa kito kiba la aiti ïa la kajong ka jingim ha ka por jong ka jingïaleh laitluid.
Ka la long ruh na ka bynta kito kiba dang ïai bteng ban ïada ïa ka ri,” la ong u Saha.
U Saha u la kdew ba ka Tripura, ha ka jingïaid ryngkat bad ka ri baroh kawei, ka rakhe ïa ka jingïakhih ha ki lai bynta naduh ka 2 haduh ka 8 tarik u Nailar, ka 9 haduh ka 12 tarik u Nailar, bad kaba khatduh eh naduh ka 13 haduh ka 15 tarik u Nailar, kaba pynkut noh da ki jingïalang pynher lama.
“Hynnin ka sngi nga la don ha kawei pat ka Assembly konstitwensi, bad mynta ka sngi nga don hangne mynta dalade. Ki briew ki pdiang sngewbha ïa kane ka jingthmu da ka jingkmen bad jingsngewtynnad. Ka jingïalap ka la wanrah ïa ka jingïeid ri ha manla ki thliew ïing,” u la kynthoh.
U Dr. Saha u la ban jur ba ka jingthmu kaba kham heh ka long ban pynkhlaiñ ïa ka jingïatylli ka jaitbynriew bad ban ai mynsiem ïa ki nongshong shnong ban noh synñiang ban pynlong ïa ka ri India kaba khlaiñ. “Kane ka prokram ka la long kaba jop shibun. Ki briew ki sngewkmen, bad ka jingïashim bynta jong ki ka pyni ïa ka jingburom kaba jylliew kaba ki bat ïa ka lama lairong jong ngi,” u la bynrap.
