Shillong, Nailar 11
Ka lahduh jong u snem ba la lah, ka NorthEast United FC ka la ïakhaid mar 2-2 kol bad ka Rangdajied United FC ha ka jingïalehkai kaba khatduh jong ka Group-E ha ka 134th Durand Cup 2025 ha ka lah sngi U Blei ha Jawaharlal Nehru Stadium.
Kumba ka paw kane ka long ka jingïalehkai kaba khatduh ïa kine ki ar tylli ki kynhun. Ka NorthEast United ka dei ka kynhun kaba la rung lypa sha ka quarter final, katba ka Rangdajied ka donkam ban pynkut da ka jingjop hadien ba la mad ïa ka jingshah rem ha ki ar tylli ki jingïalehkai ba la lah, hynrei ka la ïohpdiang ïa ka shi point.
Hapdeng ka jingïaleh-kai bha jong baroh ar ki kynhun, pynban ka NEUFC ka la ïoh ban pynkhih jar nyngkong eh lyngba u Bekey Oram ha ka minit kaba 24. Hadien shiteng kynta ka Rangda-jied ka la pynïakhaid kylla lyngba u Manbhakupar Ïawphniaw (33). Hashwa ban kut ka jingïalehkai jong ka kylla step, u Danzel Derique Umdor (45) u la ïoh ban thep kol na ka bynta ban pynlong ïa ka RUFC ban tam da 2-1 kol.
Kane ka jingïakhun ka la bteng biang ïa ka kylla miet ha kaba baroh ar ki kynhun ki la pyrshang ban ïakhun tyngeh. Hapdeng ka jingïashan tyngeh ki rangïalehkai ka RUFC, ka NorthEast United ka la ïoh ïa ka kabu kaba biang ban pynphai kylla lyngba u Jairo Samperio ha ka minit kaba 78. Kane la wan lyngba ka jingialehkai lang da u Ajaraie. Haduh kaba kut kine ki kynhun kim shym la lah shut ban thep kol bad ban ïakhaid mar 2-2 kol. Te kumta ka NEUFC ka la ïai bat kum ka kynhun kaba khlem shah rem ha kane ka jingïalehkai group.
