Shillong Nailar 11
Hadien ba ka seng Hynñiewtrep Youth Council (HYC) ka la ïoh jingtip ba kidon ki poiwir kiba sah ïingbasa ha Itshyrwat ba ki wan ha kadur ki nongthiah pang hynrei ki wan trei bylla pat, ha ka step jong ka 11 Tarik u Nailar 2025 ka la pynlong ïa seng ban leit khynra naphang ïa kitei ki ïingbasa kiba don ha Itshyrwat.
Ha katei ka jingleit khynra, ka seng ka lap ba kidon ki ïingbasa kiba ai sah ïa ki bar jylla khlem da ïaid lyngba ka Dorbar Shnong bad kiba long beaiñ ban ai ïingbasa ïa ki bar jylla namar ba kim shem la zerox ïa ki epic bad kiwei kiwei ban phah sha ka shnong bad sha ka tnad pulit.
Haba kren sha ki lad pathai khubor u Bah Rhembor Saiborne General Secretary HYC sengkmie ula ong ba kidon ki briew kiba la ïathuh sha ka seng ba kiba sah ha katei ka jaka kiwan ha ka dur ba ki thiah pang ha NEIGRHIM, Hospital hynrei ki leit bylla pat shawei.
Ula ong ba kane kan long ka jingma kaba khraw namar ba kim tip kidei naei bad lada jia ba ki leh ïa ki kam sniew hapoh ka jylla ka jynjar ban wad ïa ki.
“Ki don ki Khasi kiba ai sah ïa ki bar jylla ba wat tang ka NOC na ka shnong ruh kim don bad ïa ki kot ki sla jong ki bar jylla ba wan sah ruh kim shem la peitbha bad kane kadon ka jingma kaba khraw” la ong u Bah Rhembor.
Nalorkata, ula ong ruh ba wat ïa ki sngi ba rung ba mih jong kitei ki briew ba wan sah ruh kim shem la thoh bha bad kane ka long ka jingeh lada jia kano kano kaba sniew bad lehse ka pynshngaiñ ruh ïa ki briew ba nabar ban wan sah lada ym don kano kano ka jingpyrkhing.
Shuh shuh ula ong ha ka jingkhynra ka seng ka lap ba kidon ka jingbakla bad namar ba kidei ki paradoh parasnam kiba ai wai ïa kitei ki bar jylla, ki la bthah ba kin hap ban husiar noh nangne shakhmat ban pynjanai ïa ka kam jongki.
Ka seng lyngba u Bah Rhembor ka la bthah ïa kitei ki trai ba ai ïingbasa ba kin sngewbha ban ïatreilang bad ka shnong bad ki bor jong ka aiñ khnang ba kine ki briew ba nabar kin nym ïoh lad bad ban thmu leh ïa kano kano ka kam sniew.
Lah ban kdew hangne ba ka jingkhynra ka seng ïa ki bar jylla ba wan sah ha ka jylla kadei namar ba ka sorkar Assam ka la kyndang bad beh naphang ïa ki briew basah beaiñ ha kitei ki jaka bad ïoh lehse kidei ki ba wan poiwir na Assam basah ha kitei ki ïingbasa ha Itshyrwat.
