Mawkyrwat, Nailar 11
Ka Khasi Student’s Union (KSU) South West Khasi Hills District ka la pynpaw ïa ka jingpyrshah kaba jur halor ka jingthmu ai jaka u Syiem ka Hima Maharam ïa ki shipai BSF hajan ka wah Photmula kaba hap hapoh ka Ranikor Civil Sub Division kaba dei hajan ka surok main road Ranikor Khatpra, Photktoh, Shillong bad kaba dei ruh ka jaka kaba ju rep ju riang da ki Khasi kiba dei ki khun ki hajar jong ka Hima Maharam.
U samla Forwardman Nongrem, President ka KSU SWKHD haba kren sha ki lad pathai khubor u la ong, ka seng hadien ba ka la don ka jingpynsngew na ki khun ki hajar ka Hima Maharam ba sah sha kito ki thaiñ ba ka don ka jingthmu ban ai jaka ïa ki shipai, kum ka seng kaba peit ïa ka bha ka miat jong ki paidbah ka pynpaw ïa ka jingpyrshah kaba jur lada ka hima kan ïaid shakhmat ban ai jaka ha kito ki thaiñ.
U samla Forwardman Nongrem u la ong ruh ba “Ka khyndew Hima kam dei ka nongkynti shimet jongno jongno. U Syiem bad ka Durbar Hima ki dei tang ki nongpeit nongkhmih bad ym kita kiba lah ban die ban bynda katba mon ïa ka jaka ka bym dei ka nongkynti shimet jong ki khamtam ban leit aiti sha ki shipai.”
Kumta haba ïadei bad kane, ka seng ka dawa na u Pa’iem Niandro Syiemiong bad ka Dorbar Hima ba ki dei ban pynsangeh noh mardor ïa katei ka jingrai ban ai jaka sha ki shipai kaba ka Dorbar Hima ka la dep ban shim rai naduh u bani Jylliew, 2025.
U samla Forwardman u la bynrap ruh ba ka jingai jaka sha ki shipai kan sa ktah ïa ka shongsuk shongsaiñ jong ki paidbah kumba la ju ïohi teng ïa ki ktem shipai kaba don marjan bad ki shnong. U la ong ruh ba artad kane ka jaka ka ïajan bad ka shnong Photeitsim bad kaba dei ruh ka jaka rep jaka riang jong ki Khasi.Ym tang katta, u samla Forwardman u la ong ruh bad kane ka jaka ba mut ban ai sha ki shipai ka dei ka jaka ba itynnad bad kaba don ïa ki wah bad ki khsiad kaba don jingkyrmen ban kyntiew ïa ka kam jngohkai pyrthei ha kane ka thaiñ. Shuh shuh u samla Forwardman u la ong ruh ba lada u Syiem bad ka Dorbar Hima ki kwah ban ai jaka, ki dei ban ai bad ki jaka ba ïajan ka jingker sainar bad ka Bangladesh ym ban ai sha ki jaka ba la kham pajih, namar lada ai lei u shipai u kwah jaka wat ha Mawkyrwat ruh.
Ha kaba ïadei bad kane, ka KSU SWKHD ryngkat ka KSU Ranikor Circle ki la leit ban ïakynduh ïa u Pa’iem Niandro Syiemiong ban dawa ba dei ban weng noh mardor ïa katei ka rai ban ai jaka sha ki BSF.
Ka seng ka maham jur ba lada u Syiem bad ka Dorbar Hima kim sngap, ka seng kam banse ban shim da kiwei ki sien jam kiba kham tyngeh.
