Shillong, Nailar 11
Ka Hynñiewtrep Integra-ted Territorial Organisa-tion (HITO), ha ka Lah Sngi U Blei jong ka 11 tarik Nailar, 2025 ka la leit ban ïakynduh ïa u Myntri ba dei peit ïa ka tnat Ri Jingri ka Sorkar Jylla, u Bah Alexandar Laloo Hek ban ïakren halor ka jingshalan be-aiñ ïa ki mrad bam doh shapoh ka Ri Bangladesh bad ka jingdonkam ban buh noh ïa ki khyrdop talasi na ka bynta ban khmih ïa ki mrad bam doh kiba wan nabar ka Jylla khnang ba kan nym don ka jingktah ïa ka koit ka khiah jong ki paidbah nongbam ïa ka doh.
Haba kren sha ki lad pathai khubor, u President ka seng, u Bah Donbok Dkhar u la ong, ka jingdon ka kam khaïi be-aiñ ïa ki mrad bamdoh shapoh Ri Bangladesh ka paw lyngba ka jingïoh kurup jong ki shipai BSF kaba ju jia na ka por sha ka por bad ka jingbym don kano-kano ka aiñ ka ban pyrkhing ïa ka jingwanrah ïa ki mrad bam doh nabar ka Jylla kaba juh jingma ïa ka koit ka khiah jong ki paidbah.
U la ong ba ka Seng kala dawa ba dei ban pyntreikam ïa kane ka khyrdop baroh 24 kynta khnang ban khmih ïa kino-kino ki mar kiba wanrah nabar ka Jylla.
U Bah Donbok u la ong ruh ba ha ka jinglap jong ka seng, la lap ruh ba kiba bun ki khynnah ki la sangeh noh shiteng por ban leit pule noh namar ka jingjur palat ka kam khaïi mrad bam doh be-aiñ shabar ka Ri kaba pynlong ïa ki khynnah ba kin jaituh leit skul bad ban sngewtynnad ban ïoh ïa ka pisa.
“Da ka jingsngewkhia bad ka jingngam kaba jylliew bha, ngi lap ba kane ka jingpep skul ki khynnah ka dei ba ka la jur palat kane ka kam khaïi ar-nombar, u khynnah um treh shuh ban leit skul namarba u la bang ban ïoh pisa bad ban khaïi ïa kano-kano ka marbam doh ne kano kano ka mar shapoh Bangladesh”, ong u Bah Dkhar.
Kumta, na ka liang u Myntri u la kular ba ïa kane ka jingdawa ban buh ïa ki khyrdop talasi yn pyntreikam noh hapoh ka ar bnai ha kaba na ka liang u Bah Donbok u la ong ba lada u Myntri um leh eiei halor kane, ka seng kan sa shim hi da ki sienjam ban khmih hi noh dalade ïa kitei ki mar.
“Lada ka Sorkar kam lah ban leh mardor, ka HITO kan ym don lad shuh hynrei ban sdang la ki jong ki jingpeit bniah bad jingtohkit ba laitluid ban ithuh ïa ki lynti ïaid, ki briew kiba donkti bad ka jingbym shimkhia jong ki bor Sorkar kaba pynlah ïa kane ka jingkhaïi beaiñ. Ïa kum kine ki jinglap yn sa leh paidbah bad pyni ha ka rukom kaba thikna ha ki bor synshar. Kum kane ka jingpynpaw pyrthei kan ym pynjah burom tang ïa ka Sorkar hynrei kan pynduh ruh ka jingshaniah jong ki paidbah ha ka jingsynshar kaba mynta”, bynrap u Bah Dkhar.
