Shillong, Nailar 11
U Myntri Sorkar bad nongïalam ka BJP, u Bah A.L. Hek u la ban jur halor ka jingdonkam ban ïada na ka jingwan rung kyrthep jong kiba nabar shapoh ka Jylla, da kaba ong ba ka dei ka kamram jong ka Sorkar bad ki paidbah kumjuh ban pyntikna ïa kane.
“Ka dei ka kamram jong ka Sorkar bad ka kamram wat jong ki paidbah ruh ban pyntikna ba ka jingwan rung kyrthep kam dei ban wan jia ha ka Jylla Meghalaya,” ong u Bah Hek haba kren sha ki nongthoh khubor ha ka Lah Sngi U Blei.
Haba ïadei bad ka jingshah kem ba dang shen jong ki nong Bangladesh namar ka jingthombor ïa uwei u nongshong shnong ha ki thaiñ khappud, u Bah Hek u la ong ba ka dei ka kamram ka Sorkar ban pyntip sha ki bor ba dei khmih ka Sorkar Pdeng halor ka jingwan rung kyrthep kiba na shabar ri.
Ha kajuh ka por, u la ban jur ba ka long kaba kongsan ïa ka Sorkar ban shim ïa ki lad ki lynti ban shimkhia ïa kane ka jingeh.
“Ki tnad treikam bapher-bapher, kynthup ïa ki pulit bad ka Border Security Force (BSF), ki trei minot ban khanglad ïa ka jingwan rung kyrthep jong kiba nabar,” la ong u Myntri.
Na ka liang u Bah Hek, u la pdiang sngewbha ruh ïa ka jingtyrwa ka Sorkar ban wanrah ïa ka aiñ ne ka rukom treikam ka bathymmai ban ïada ïa ka Jylla na ka jingwan rung kyrthep. Hashuwa, ha ka jingkren jong u kaba dang shen, u Bah Hek u la pynpaw ïa ka jingkyrmen skhem ba ka Meghalaya Residents Safety and Security Act (MRSSA) ka dei ka rukom treikam kaba biang eh ban tehlakam ïa ka jingwan rung jong ki briew.
