Shillong, Nailar 11
Ka Meghalaya Pradesh Congress Committee (MPCC) lyngba u Bah Lang Kupar War, Chairman ka tnat Social Media, ka la ong ba ki jingkren ba dang shen da u Nongaiktien ka Voice of the People Party (VPP), u Dr. Batskhem Myrboh, ha kaba ïadei bad ka jingphet seng u Bah Ronnie V Lyngdoh sha ka NPP, ka donkam ïa ka jubab kaba thikna bad kaba shai bha.
Ka Congress ka la ong ba ka jingbatai jong u Bah Myrboh ïa ka Congress kum “ki suri kup snieh langbrot” ka lah ban pynlong ïa ka jingkren beiñ kaba sngewtynnad, hynrei ka iehnoh ïa ka jingshisha kaba paw shai-ki jingeh hapoh bad ki jinglong ba ïaleh pyrshah ki long shi bynta jong manla ka seng saiñpyrthei, kynthup ïa ka VPP.
“Ka VPP hi ka la mad ïa la ka jong ka bynta jong ka jingkynrum kynram, khamtam eh ka jingshah sospon jong u Bah Adelbert Nongrum bad ki nongkyrshan jong u tang hapoh shisnem hadien ba u la shah jied kum u Nongmihkhmat. Kum kine ki jingjia kim dei tang ha kano kano ka seng; ki long ka jingpynpaw ïa ka jinglong ba thymmai bad bunsien ba jylliew jong ka saiñ hima sima bad ka synshar paidbah. Lada dei ban pyndonkam da ki jingpyni nuksa, dei ban pdiang ba ka Liang Pyrshah kam dei ka jaka shong tang jong kawei ka jait “suri”, ong ka Seng.
Ka Congress ka la ong ba u Dr. Myrboh u la kynthoh ruh ba ka Liang Pyrshah kam dei tang ha ki jingïakren hapoh ka Ïingdorbar Thawaiñ bad ba ka VPP ka la “pynsngewthuh” shabar jong ka Ïingdorbar ruh kumjuh.
Ka Congress kala ong ba kane ka dei ka rukom kaba biang, hynrei kam dei kaba thymmai bad ong ba ka Congress ka la leh thik ïa kane la bun phew snem-kaba dang shen bad kaba kyrkieh tam ka dei lyngba ka jingïakhih paidbah jong u Rahul Gandhi pyrshah ïa ka jingpyrshang ba ryntih jong ka BJP ban pynkylla ïa ki thup nongthep vote, ban pynthut ïa ka Election Commission, bad ban pyntlot ïa kawei pa kawei ka jingïada jong ka riti synshar kaba ïada ïa ka Ri jong ngi.
“Kane kam dei ka politik kaba man ka sngi; ka dei ka jingïaleh na ka bynta ka jingim jong ka mynsiem synshar paidbah jong ka India-ka jingïaleh ban leh ne ban ïap ban pynneh ïa ka jinglong ba janai jong ki elekshon jong ngi, ïa ka jinglaitluid jong ki tnat treikam jong ngi, bad ïa ka jinglong ba bun jait jong ka jaidbynriew jong ngi. Kine ki jingleh beiñ ki la dei ban pynkhih ïa kawei pa kawei ka jingsngew saiñ pyrthei ha ka ri. Hynrei na kawei ka seng kaba kam ba ka ïeng na ka bynta ki paidbah, ngi la ïohsngew tang khyndiat eh kaba kordor ha kaba pyrshah ïa kane ka jingshah thombor kaba paw bad kaba hakhmat ïa ki nongrim hi jong ka synshar paidbah jong ngi. Ka jingsngap jar, ha kum kine ki por, kam dei ka jinglong pdeng- ka dei ka jingiehnoh”, bynrap ka Seng.
Da kaba pynpaw ïa ka jingmynjur halor kawei ka bynta bad u Dr. Myrboh, ka Seng ka la ong ba ka jingphet noh jong u Bah Ronnie V Lyngdoh, ka weng noh ïa ki katto katne ki jingïaleh hapoh ka Seng bad ong ba ka rai jong u ka dei ka jong u hi, hynrei ka Congress ka dang shaniah skhem ha ka jingshaniah bad jingieid ba neh jong ki paidbah ka Meghalaya.
“Kane ka khyllipmat ka ailad ïa ngi ban tei pat da ka jinglong nongïalam kaba thymmai, ka jingaiti kaba thymmai, bad ka jingpyrkhat kaba kham khlaiñ ïa ka jingbha jingmiat jong ki nongshong shnong jong ngi”, ong shuh-shuh ka Seng.
Da kaba khot bad wer ruh ïa ka VPP ban ïatreilang bad ka Congress ha kaba kren shai-da kaba beit bad khlem jingartatien-pyrshah ïa ki jingshah thombor jong ka BJP kiba dang ïai bteng ïa ki Khristan, ki jaidbynriew rit paid, bad ki jingleh ñiam ba bun jait jong ka India.
“Ki paidbah ka Meghalaya kim dei hok ban ïoh tang da ka jingkren bein ne jingkren lyngkot, hynrei ka jingtrei kaba ïatylli, kaba don nongrim ban ïada ïa ki jinglong synshar paidbah jong ngi”, pynkut ka Seng.
