Jowai, Nailar 11
Ka jingleit ïalehkmen ha Syntur Ksiar, Jowai ha ka 10 tarik Nailar ka la lam pynban sha ka jingjia ba sngewsih hadien ba uwei u riew paidbah u la mynsaw jur na kaba kum siat ïa lade da ka pistol jong uwei u pulit Sub Inspector.
Katkum ka kaiphod ba nyngkong ne preliminary report hapoh thanad Jowai, ïa ki jingtip ba hashwa lyngba ka ktien la ïoh pdiang nyngkong na ka Kong Lutimon Najiar kaba la pyntip ba u para jong ka u Wanda-O Najiar u la ngat ha ka jingmynsaw na ka jingdei kuli na ki bynta jong ka khlieh ha ka por kumba 4:30-5:00 katba u dang don hapdeng ka jingleit ïaleh sngewbha bad u Sub-Inspector Wewan-roy Challam, 2nd O/C ka Nartiang Police Station bad u Manda-oo Dkhar.
Ki pulit ki la khot hajir ïa u SI Challam sha thanad Jowai ban tohkit ha kaba la phah ïa u ban leh ïa ka medical examination.
Ha ka jingtohkit, u Wewanroy la ïathuh ba hadien ba ki la ïa dih kyiad, u Najiar u la sei ïa ka pistol jong u bad sdang ban tamasa. Hynrei namar ka jingshoh khawiang, ka pistol ka la kum bthei kaba la pynlong ïa u ba un ngat ha ka jingmynsaw. U la ong ruh ba kam shym la don satia kano kano ka jingïania ba ka huri hura bad ba kane ka dei na ka jingkum siat bakla.
U Manda-oo Dkhar ruh u la ïathuh ha ki pulit ba katba ki dang don ha katei ka jaka ïaleh sngewbha ryngkat ka ïa dih kyiad, u Najiar u la shim ïa ka pistol jong u SI Challam bad sdang ban lehkai. U la ong ruh ba hadien ba u la wan na kaba leit shabar u la lap ïa u Najiar uba la thiah lyngktar hapdeng ka jinglyngkien jong ka snam.
Kumta mardor na ka liang u SI Challm u la pynkit noh ïa u Najiar da ka kali jong u shapoh MCH hospital ha Panaliar bad hadien la pynkynriah noh shapoh Woodland Hospital, Sabahmuswang na ka bynta ban pynïoh ïa ka jingsumar.
Hadien kane la pynkynriah biang ïa u Najiar shapoh Woodland Hospital, Shillong ban ïoh ïa ka jingsumar kaba kham biang.
U Superintendent of Police ka West Jaiñtia Hills, u Jagpal Singh Dhanoa u la ong ba ïa kane ka pistol la kurup noh na ka bynta ban leh ïa ka forensic examination bad la ai ruh da ka show-cause notice pyrshah ïa u SI Challam.
“Kane ka dei tang ka jingtohkit kaba nyngkong. Yn sa leh shuh shuh ïa kaba donkam da ka tnat katkum ka aiñ bad kaba shong eh ha ka jingphla jong u lanot,” ong u SP.
