Agartala, Nailar:
Ki pulit jong ka Tripura ki la ïoh ban kem ïa uwei u nong Bangladesh ha Arundhuti Nagar kaba don ha Agartala ha ka sngi U Blei. Ïa une uba la shahkem la tip kyrteng kum u Sohag Rana, 21.
“Ngi la ïoh jingtip shaphang ka jingshang bad ka jingïaid lynti jong ki nong Bangladesh ha ka thaiñ Arundhuti Nagar. Haba la ïoh ïa ka jingtip kaba bniah halor kane, ngi la pynlong ka jingthwet bad ngi la ïohkem ïa une u bar ri. Ngi la buh da ka jingujor pyrshah ïa u hakhmat ka ïingbishar,” la ïathuh u heh pulit ha ka jaka treikam jong ki pulit ka Arundhuti Nagar.
Ha basdang une u snem, ka sorkar jylla ka la thaw ïa ka kynhun Special Task Forces (STFs) ha baroh ki distrik ban ithuh bad ban ïoh pynphai ïa ki nong Bangladesh kiba wan buhai shnong beaiñ ha kaba kan long kumjuh ïa ki Rohingya.
U Myntri Rangbah ka jylla u Dr Manik Saha uba bat ruh ïa ka tnad Home Portfolio u la ïathuh ba la thaw ïa ki Special Task Force ban wad lada ka don kano kano ka jingwan rung kyrthep naduh u snem 2014 lane lada don kino kino ki jingjia kiba dang shu wan rung be-aiñ dang shen.
“Nga la ong kham mynshwa ba yn ym shah ïano ïano ban rung beaiñ sha Tripura. Katkum ka jingtip bathymmai jong ngi, ki bar jylla kiba la rung beaiñ sha Tripura ki duna bha. Ngi shim khia bha ïa katei ka mat”, la ong u Saha ha kawei na ki jingïalang ba la dep ban pynlong hashwa.
Ka Tripura ka don 856 km ka khappud pyrthei bad ka Bangladesh, kynthup ïa ki khappud kiba don harud wah, kiba bun na ki la ker da ki nar nar lait noh tang katto katne ki jaka kiba dang sahkut namar ki jingïakynad jong ki nongshong shnong.
