Sindirgi, Nailar:
U jumai uba 6.1 ka jingkhlaiñ, u la pynkhynñiuh ia ka thaiñ West jong ka nongbah Sindirgi jong ka Turkey ha ka Sngi U Blei, katkum ka khubor na ka tnat Disaster Management jong ka Turkey (AFAD), ha kaba uwei u la khlad syndon ha katei ka jingjia bad ka jinglynshop jong ki bor ka mariang.
Ia utei u jumai la iohsngew na kylleng ki thaiñ ba marjan jong katei ka nongbah kaba don sha ka phang West jong ka Turkey, kynthup ia ki nongbah ba marjan kum ka Istanbul bad katto- katne ki jaka jngoh kai ha Izmir.
U Myntri ka tnat kam poh iing ka Turkey- u Ali Yerlikaya, u la ong ba watla ki tnat iarap ki la ioh ban sei noh ia utei u tymmen 81 snem na katei ka jaka ba la julor, hynrei u la khlad noh pat tang hadien katto- katne por ba la ioh ban sei ia u na katei ka jaka.
Nalor jong utei u tymmen ba khlad, la don ruh sa 29 ngut kiwei pat kiba mynsaw ha na utei u jumai uba khlaiñ bor, hynrei ym shym la don pat kiba mynsaw jur haduh katta.
La ong ba utei u jumai u la pynkhyllem haduh 16 tylli ki iingmala bad katto katne ki jingtei ki la julor ryngkat lang bad kitei ki iingmala, ha kaba 4 tylli lei ki dei ki iingmala kiba la julor bun, kynthup ia kawei ka iingmala kaba 3 mala, kaba don ha ka phang pdeng jong katei ka nongbah.
Na katei ka iing ba 3 mala, la ioh ban sei tng ia ki katto- katne ngut ki briew kiba don hapoh, ha kaba ki don hynriew ngut ki briew kiba dang sahkut hapoh. Ia utei uba khlad ruh la ioh sei napoh ki kynrum- kynram ba la lwet bad kiba la ioh ban kumba tep ia u hapoh khyndew, hashwa ban ioh ban sei noh ia u na katei ka jaka.
Kumba 319 ngut ki nongïarap ba nyngkong la phah sha katei ka jaka ba shah ktah, la iathuh ki nongthoh khubor.
Utei u jumai, u la jia ha ka por 7:53 baje mynstep (1653 GMT), ha kaba ki don kumba 20 tylli ki jingkhynñiuh jumai kiba la sdang naduh 3.5 haduh 4.6 ka jingkhlaiñ.
Ka Turkey ka la shah ker sawdong ha ki katto katne ki bynta kiba long shong syier bad kiba ap jingma bha na ki bor jong ka mariang.
Ka jingkhynñiuh u jumai bah ha u bnai Rymphang jong u snem 2023 ha ka thaiñ Shatei Lam Mihngi ka la shim ia ka jingim ki briew ym duna ia ka 53,000 ngut bad ka la pynjulor ia ka Antakya, ka jaka jong ka nongbah Antioch naduh ki por hyndai. Ha kaba sdang jong u bnai Naitung, ka jingkhynñiuh u jumai uba 5.8 magnitude ha kane kajuh ka thaiñ ka la shim ia ka jingim jong uwei u briew bad kumba 69 ngut kiba mynsaw ha katei ka por.
