Shillong, Nailar 11
Ka lympung ïalehkai ASMITA Khelo India City Wushu Women’s League 2025 ba la pynïaid da ka Meghalaya Wushu Association (MWA) ka la long kaba jop ha ka 9 tarik mynta u bnai ha SAI Training Centre.
Kane ka jingïalehkai ka la sakhi ïa ka jingïashim bynta na ki ‘thei ïalehkai kiba don sap ha kylleng jong ka thaiñ, kaba pyni ïa ka mynsiem jong ka jingïalehkai, ka jingtbit, bad ka jingkut jingmut.
Kane ka lympung kaba la pynlong hapoh ka jingkhmih da ka tnat ïalehkai jong ka Sorkar Pdeng lem bad ka Sports and Sports Authority of India, ka thmu ban kyntiew ïa ka jingïashim bynta jong ki kynthei ha ki jingïalehkai bad ban ailad ba kin pyni ïa ki sap ha ka jingïalehkai Wushu.
Ha kane ka lympung la wan shim bynta da 150 ngut ki ‘thei ïalehkai na ki 12 tylli ki skul jong ka nongbah bad la phiah ïa kane ka jingïalehkai ha la ki jong ki kyrdan ïalehkai.
Ha katei ka sngi pynhap pyrda la ïadon lang ka Dr. Thywill Susngi, kaba long ka dkhot jong ka Meghalaya Women’s Commission, kumjuh u Abhinav Sharma (Deputy Director ka SAI Delhi), u T.S Chavhan (Deputy Director ka SAI Training Centre, Shillong) , u Murali Chaudary (Treasurer ka Wushu Association of India), Ranjit Boro (General Secretary ka Wushu Association of Assam), u Komo (dkhot ka WAA) Bah John F. Kharshiïing (Working President ka MSOA) , Bah Donny R Ranee (President ka MWA, Jerry F Wankhar (General Secretary ka MWA) bad kiwei kiwei.
“Kane ka lympung kam dei tang ka jingrakhe na ka bynta ki ‘thei ïalehkai don sap ha ka Wushu, hynrei ka pynshlur ïa kiba dangkhie dangsan ba kin shim bynta ha kane ka jingïalehkai.
La pynkut ïa kane ka lympung da ka jingsam ïa ki khusnam, ha kaba ki nongjop ki la ïohpdiang da ki takma, ki syrnod, bad ki trophy.
