Shillong, Nailar 11
U rangïalehkai ba shakhmat jong ka Liverpool, u Mohamed Salah, u la kynthoh halor ka jingai burom jong ka UEFA ïa u Suleiman al-Obeid, uba la khlad noh, ïa uba la tip kum u “Palestine Pele”, hadien ba ka kynhun pynïaid jong ka phutbol Europe, kam shym la lah ban pynpaw ïa ki jingjia shah pynïap utei u khlur ïalehkai ha ka taïew ba la lah.
Na ka liang ka synjuk ïalehkai Palestine Football Association ka la ong ba u Al-Obeid, ba la 41 snem ka rta, u la shah pynïap ha ka jingthombor ka Israeli ïa ki riew paidbah ha ka bynta kaba shaphang shathie jong ka Gaza Strip ha ka sngi Balang.
Ha ka jingthoh lyngkot ha ka X, ka UEFA ka la pynpaw ïa une u rangïalehkai barim jong katei ka ri “uba don sap uba la ai jingkyrmen ïa ki khynnah bym lah kheiñ, wat ha ki por ka jingwan kah u lyoh uba dum”.
Na ka liang u Salah u la ong ha ka sngi Saitjaiñ: “Phi lah ban ïathuh kumno u la ïap, shano bad balei?”
U Bassil Mikdadi, uba long u nongseng ïa ka Football Palestine, haba pynpaw ha ki lad pathai khubor, u la ong ba um shym la khmih lynti ba ka synjuk ïalehkai phutbol kan jubab halor kane ka jingshah kynthoh.
“Ka UEFA kam shym la pynmih ïa ka jingbuddien, bad ban kren beit, ngan sngew lyngngoh lada ki leh kumta,” u la bynrap da kaba kdew ïa ka “jingsngap jar kaba pura” jong ki synjuk ïalehkai phutbol bad ki nongïalehkai naduh ba sdang ka thma pyrshah ïa ka Gaza.
Wat ka jingai burom jong ka UEFA ïa u Al-Obeid “ka la long kaba phylla khyndiat”, la bynrap u Mikdadi.
“U Suleiman al-Obeid um dei u nongïalehkai phutbol ka Palestine ba nyngkong eh ban ïap ha kane ka jingthombor ha kaba ki la don palat 400 ngut, hynrei u long uba paw haduh mynta.”
U Salah, uwei na ki khlur ba kynsai ha ka Premier League, u la ïasaid ba dei ban ailad ïa ki jingïarap ïa ki briew ban rung sha Gaza ha ka thma kaba la jan dap ar snem.
Hynrei don kiba jubab ïa ka jingthoh jong u Salah, kiba la buh jingkylli balei ba ka la shim por ïa utei u rangïalehkai ba la 33 snem na Egypt ban shim khia halor ka jingïap ha ka jingshah hiar thma ha ka Israel.
