Nongpoh, Nailar 11
Uwei u heprit uba dang 14 snem ka rta u la duh ei noh ïa la ka jingim hadien ba u la ngam jyllop ha kawei ka jaka kaba marjan bad ka skul Umsning Town Dorbar Secondary School, Umsning.
Katkum ka khubor ba la ïoh lum, la ïathuh ba utei u heprit u dei uba pule ha katei hi ka skul Umsning Town Dorbar Secondary School bad ba katei ka jingjia ka dei kaba la jia ha ka por ba ki dang lait shiteng sngi ban bamja.
La ïathuh ruh ba utei u heprit lem bad ki paralok klass ki la mih na skul ban leit bamja lang ha ka jaka ba marjan, ba la wan jia katei ka jingjia ba sngewsih kat haduh ba un ngam jyllop bad duh syndon ïa la ka jingim.
Hadien katei ka jingjia, ïa utei u heprit la pynkit noh mar mar sha Umsning CHC ha kaba ki bor ba dei khmih katei ka jaka ai jingsumar kila pynbna ba u la dep khlad lypa.
Namar ka jingbym don ka jingsuba sniew halor ka jingkhlad utei u heprit, ki bahaïing hasem ki la kyrpad ban pynlait noh ïa ka postmortem ha kaba na ka liang u majistor ruh u la pdiang ïa katei ka jingkyrpad bad la aiti noh ïa ka met utei u heprit ban pyndep ïa ka jinglehniam khatduh sha ki bahaïing hasem.
