Shillong Nailar 11
Ki nongtrei 108 hapoh ka lama jong ka Meghalaya EMRI Workers’ Union (MEMRIWU) kila phah da ka jingthoh sha u Mission Director ka National Health Mission (NHM) Ramakrishna Chitturi, ban phah tuklar mardor halor ka jingslem ban pynkiew ïa ka tulop jongki.
Kane ka kynhun kala pynpaw ïa ka jingeh kaba la mad da ki nongtrei ha kaban pyndap pynbiang ïa la ka ïing ka sem namar ka jingkiew dor ki marbam mardih.
Ha ka shithi ba la phah sha u Mission Director ka National Health Mission (NHM) Ramakrishna Chitturi ki nongtrei 108 ki la pynpaw ba kala don ka jingïakren ha ka jingïalang hapdeng ka seng bad u Mission Director ha ka 27 tarik u Jymmang 2025.
Kala ai jingmut ba dei ban don ka jingpynkiew jingsiew kaba T.5,000 ïa ki nongtrei katkum ka jingïoh tulop kaba mynta. Katba kane ka kam ka dang don hapdeng ka jingkhmih bniah, ki nongtrei kila ïoh jingtip ba ka pisa kala don pahuh na ka bynta ban pynkiew ïa ka tulop.
“Kumba la ïakren kham hashwa ban ai sa mar T.5,000 kan dei kaba la khmih bniah la kan long kaba lah ne ka bym lah, na ka liang ka seng kala buddien ïa kane ka mat bad kala ïoh jingtip ba kala don bun ka pisa na ka bynta ban kyntiew. Namar ka jinglut jingsep kala kiew bad remdor kumta ka long kaba eh ban pyndap pynbiang ïa ki jingdonkam kiba man la ka sngi” pynpaw ka union ha ka shithi.
Shuh shuh ka union kala kyrpad ïa u Ramakrishna Chitturi ba sngewbha ban shim ïa ki sienjam bad leh eiei noh mardor halor katei ka mat kaba la kdew haneng khnang ba ngin lah ban pyndap ïa ki jingdonkam.
“Ngi dang ap ban ïoh ïa ka rai kaba pura bad ka jingai jingmynjur” la bynrap ka union.
