Shillong, Nailar 11
Ka Khasi Students’ Union (KSU) Laban Circle ka la pynher krad noh ïa uwei u briew uba ju kam ïalade kum u kontraktor halor ka jingkynnoh ba u ju mlien ban wanrah ïa ki briew ba nabar Jylla lehse kiba lah ban dei ruh ki nong Bangladesh.
Kane ka la wan jia hadien ba ka seng ha ka kylla step jong ka 10 tarik Nailar ha ka por 1 baje eiei ka la ïoh bat ïa 2 ngut ki briew kiba dei ki Muslim na Oxford Hills kaba hap hapoh Dorbar Shnong Kenches Trace, Oxford Rilbong.
Ka seng hadien ka jingtohkit ïa ki kot ki sla, ka la lap ba kine ki briew kim shym la don kino-kino ki kot ki sla ban pynithuh ïalade bad la wan ïalam ïa ki ban trei bylla ha kawei ka ïing kaba don ha Oxford.
“Ynda la khynra ïa kata ka ïing, la lap sa 4 ngut ki Muslim ki bym don kot don sla. Kine ki briew ki ïoh rung sha Meghalaya da kaba ki wan da ki kali ‘tourist’ bad pynithuh ïalade ba ki dei ki nongwan jngoh kai bad ha ka jingtohkit ka seng, la lap ba ki dei ki poi-ei kiba wad jaka rieh shane ha ka kam bylla bad ki ïoh jingïarap lyngba uwei u briew uba kyrteng u Shajahan Ali uba dei na Assam bad uba sah ha Laban, uba ju pynbiang jaka trei ïa kine ki briew,” ong u Information & Publicity Secretary, KSU Laban Circle, samla Franky Rani ha ka kyrwoh khubor.
Ïa kitei ki 6 ngut la aiti noh sha ki pulit ka Rilbong Beat House ha katei hi ka kylla step.
Na ka liang ka seng ha ka step 11 tarik ka la leit ban kyndang ïa ka ïingsah jong utei u briew (Shajahan Ali) bad beh krad shi syndon ïa u.
“Une u kam ïalade ba u dei u kontraktor bad uba ju mlien ban wanrah ïa kine ki briew nabar Jylla bad lehse ki lah ban dei ruh ki nong Bangladesh,” ong u samla Rani.
Ka seng ha kajuh ka por, ka la maham ïa u trai ïing ba ai wai ïa utei u briew ban ym bit ban ai ïing wai sha ki briew kiba wan nabar Jylla khamtam ki Muslim namarba ka dang ïaid ka jingkyndang ka Sorkar Assam ïa ki Muslim ha Assam bad ka jinglong-jingman ha Bangladesh – ki Muslim ki dang phet wir bad ki ïaleh ban rung sha ka Jylla (Meghalaya).
“Ka seng ka lap ruh ba bun na kine ki Muslim ba sah ha Laban ki ju ïarap para Muslim ban ai jaka sah, khlem pyntip ïa ki bor shnong. Halor kane, ka seng ka la ïakren ruh bad ki bor Shnong bad na ka liang ka Dorbar Shnong Laban mynta ka dang pynlong ïa ka ‘Survey’ ban tip ïa ki Muslim ba shong ba sah ha Laban,” ong ka kyrwoh na utei u nongïalam.
Shuh shuh ka seng ka maham tyngeh ïa ki nongshong shnong ka thaiñ Laban baroh kawei ba kim bit ban pynshong pynsah bad pynbuhai shnong ïa ki para Muslim ba wan nabar Jylla ha Laban bad ki trai ïing ki dei ban shimkhia halor kane ka bynta.
“Lada lap, ka Seng kan shim ïa ka sienjam kaba tyngeh pyrshah ïa ki trai ïing, bad kine ki briew kiba ai jaka sah ïa kum kine ki Muslim ba poi-ei hapoh ka shnong ka thaw bad ka Bri Hynñiewtrep ka jong ngi,” u la ong.
