Jowai, Nailar 11
Ka North Liberty Higher Secondary School, Jowai ha ka lah sngi U Blei ka la pynlong ïa ka jingïalang ai khublei halor ki artylli ki jingjop ba kongsan jong ka skul kata ka jingjop ka kynhun ïalehkai Under-17 Boys ha ka State Level Subroto Mukhejee Cup bad ka jingïashim bynta ki khynnah skul ha ka NE-SPARKS.
U MLA ka thaiñ, u Bah Waildmiki Shylla ula ai ïa ka khusnam pisa kaba T. 1 lak tyngka sha ka skul kum ka jingithuh ïa ka jingjop jong ka kynhun ïalehkai phutbol ha ka Subroto Cup kaba ka skul ka la pynkut noh ï aka jingïaiap khmih lynti kaba 8 snem lynter ban ïoh ïa ka nam lahduh ha ka jylla.
Kane ka jingjop la pynskhem da ka kol ba la thep da u Lastborn Suting, kaba la pynlong ïa kane ka kynhun ban ïoh jaka ha ka International Subroto Mukherjee Cup Tournament ka ban long ha ka nongbah Delhi kaba dei ruh ka sien nyngkong na ka bynta ka Jaiñtia Hills.
Ka North Liberty ka la pynkup burom ruh ïa u Bah Lammat-oo Laloo, General Secretary ka West Jaiñtia District Sports Association, halor ka jingshakri bad aiti lut jong u haduh 25 snem kum u Match Commissioner jong ka State Level Subroto Mukherjee Cup bad ïai bteng ban kyntiew ïa ki kam ïalehkai hapoh ka District.
La pynkup burom ruh ïa u coach u Bah Dapmon Tariang (AFC B Diploma), u Damehi Kyndiah, bad u Joshwa Pohdweng (baroh arngut ki dei kiba la ïoh ïa ka kyrdan AFC C Diploma), ryngkat bad ka Team Manager bad ka Counsellor ka Pretty Nola Talang, na ka bynta ki kam ba kongsan jong ki ban kyntiew ïa ki nongïalehkai.
Na ka liang u Principal ka skul u Bah B. Richard Uriah u la pynkynmaw kumno ki khynnah skul kiba shisien la ai kyrteng ïa ki “Ki khniang bam kot” ki la sdang ban leh bha ïa ki jingïalehkai kum ka phutbol bad badminton. U la ai khublei ïa u DSO barim bad u coach ka AFC Pro License u Bah Hering H. Sangpliang bad ïa ki coach ba mynta kiba la ïalam ïa ka kynhun sha ka jingjop.
Haba kren ha kane ka jingïalang, u Bah Wailadmiki u la ïaroh ïa ka jingpynleit jingmut jong ka skul ha ka pule puthi bad ka jingïalehkai. U la batai ïa ka pilisi ka Jylla, kaba ai khusnam ïa ki nongïalehkai kiba jop takma da ki khusnam pisa naduh T.1.25 lak haduh T. 25 lak.
Ha kane ka sngi la pynkup burom ruh ïa ki samla pule ka North Liberty kiba la shah jied na ka bynta ka Programme NE-SPARKS. Ha ka jingleit jngoh jong ki sha ka ISRO Bengaluru ha ka 24-25 tarik u Naitung, ki samla pule ki la leit jngoh ïa ki jaka wad bniah bad ki la ïakynduh ïa ki stad saian ba la kham rangbah.
U Bah Lammat-oo ula ïaroh ïa ka jingpyrshang jong u principal ka skul ha kaba pynroi ïa ka sap ïalehkai bad kyntu ïa ki nongïalehkai ban ïai long kiba ïatylli ha ka kam ïalehkai. “Ai ïa kaba bha tam, ïoh ïa ka jingjop, bad long ki nongjop jong u snem 2025”, u la ong.
Kane ka jingïalang ka la long ruh ka dak ka jingsngew sarong ïa ka North Liberty Higher Secondary School, kaba pynpaw ïa ka jingkiew jong ka jingtbit jong ka ha baroh ar ki jingpule bad ha ki kam ïalehkai ha Jowai.
