Shillong, Nailar 11
Ka Taekwondo Association of Ri-Bhoi District (TARB) ha ryngkat ka jingïatreilang bad ka Meghalaya Taekwondo Association, ka la pynkut noh ïa ka prokram ai jinghikai kaba shiphew sngi lynter ba la tip kum ka ‘Open Coaching Camp and Selection Trial’ bad kane ka long shi bynta ban pynkhreh ïa ka 39th National Games 2027 ka ban long ha ka jylla Meghalaya.
Ïa kane ka lympung la pynlong ha I.C.A.R Indoor Stadium, Ri-Bhoi bad ka jingthmu ban ithuh bad ban sei ïa ki sap ïalehkai jong ki khynnah jong ka thaiñ.
Ha kane ka prokram la ïadon lang u Jadumani Singh, General Secretary ka Meghalaya Taekwondo Association (MTA); u Deep Khatri, kumjuh u Joint Secretary ka UEKHDTA u Raju Pahari bad u Bikon Deka (National Referee).
Ha kane ka prokram ai jinghikai la wan shim bynta da ki khynnah ïalehkai jong ka thaiñ Ri-Bhoi bad la wan ban ai jinghikai da u coach u Jeetu Bagdas. Hadien kane la pynbud da ka jingpyrshang ban jied ïa ki nongïalehkai kiba tbit na ka bynta ban ïoh ka lad ban mihkhmat ïa ka district sha ka State Level khnang ban ïoh pat ka lad ban shim bynta ha ka National Games 2027.
