New Delhi, Nailar:
Uwei u samla 20 snem na Australia, u la paw nam ha ki rynsan ‘Social Media’ bad ha kylleng jong ka ‘Internet’ hadien ba u la pynpaw ialade kum u President jong kawei ka ri kaba rit kaba u la seng thymmai kaba don tang kumba 125-Acre ka jingheh, kaba long ka ri khlaw hajan jong ka wah Danube River kaba hapdeng jong ka Croatia bad Serbia. Katei ka ri kaba rit, kaba u la seng thymmai, ka dei kaba don tang kumba 400 ngut ki nongshong shnong kiba la bud ia ka jingialam bad jingsynshar jong u. Ia utei u briew la ithuh kum u Daniel Jackson bad u la ioh ban kam trai ia katei ka jaka naduh ba don ki jingiakynad hapdeng kitei ki para marjan ri naduh ki por ba la leit.
U Jackson u la ong ba ka jingpyrkhat jong u ban seng da katei ka ri kaba thymmai kaba u la buh kyrteng ka ‘Verdis’, dei naduh ka rta kaba u dang don tang 14 snem, hadien ba ma u bad ki katto katne ki paralok jong u, ki la wanrah ia katei ka jingmut ban thaw thymmai ia kaei- kaei kaba ym don ba poi pyrkhat bad lehse ka lah ban long kum ka kam khlehbiej. U Jackson, u nong pynwandur ‘Digi-tal Designer’ jong ki ‘Roblox’, u la sdang ban thaw ia ka sorkar ‘Verdis naduh ka rta ba 18. Kumta, katei ka ri ‘Free Republic of Verdis’ ka don ia ka khlaw kaba kumba 0.5 Square Kilometre ka jingheh kaba la buh kyrteng ka ‘Pocket Three’, kaba long ka bynta ba ka Croatia lane ka Serbia ruh kim shym la kam trai shuh.
