Shillong, Nailar 11
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor kaba la ïoh na ki pulit la ong ba u Bah Derick S Lyngdoh uba na Lower Lachumiere, Shillong u la ai ka jingujor ha ka 9 tarik mynta u bnai, ba ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-1662.
Ha kawei pat ka khubor, u Depen Borah u la ai ka jingujor ba ha ka 9 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-5302 na MPRO Quarters, Mawpun, Shillong.
Kumjuh ruh na ka liang jong u Bah Banteilang Marbañiang u la ai ka jingujor ba ha ka 8 tarik mynta u bnai, ha ka por kumba 8.30 mynstep, u la lap ba ka arshaka ka jong u, ka la jah na Mawshbuit, Shillong.
Ha kawei pat ka khubor shah tuh, ka Kong Rachelda Rapthap kaba na Mawlai, Mali-I, Shillong ka la ai ka jingujor ba ha ka 2 tarik mynta u bnai, ki runar bym lah ban ithuh ki la ïoh ban tuh ïa ka bek pisa kaba don ka pisa T.10,600/-, ar tylli ki mobile phone, ATM card bad ka ID card.
Shuh shuh la ong ba kham hadien katei ka Kong ka la lap ba ka pisa kaba long T.25 hajar la shah sei na ka bank account ka jong ka.
