Mawkyrwat, Nailar 11
Ki paidbah nongshong shnong khappud jong ka South West Khasi Hills District ki la ïoh ban kem noh sa ïa uwei u nong Bangladesh bad lyngba ki dur la ïohi ba u la thiah lyngktar ha madan ryngkat ka jingmynsaw hadien ba u la shah bom shah tied ha ki paid bhur ha ban da jem jai.
Katkum ka tyllong khubor ba la ïoh lum la ïathuh ba ha ka 11 tarik u Nailar, 2025 ha ka por kumba 4:30 eiei la ïoh jingtip na ki paidbah ka Kaitha Kona ba la ïoh ban kem sa ïa uwei u nong Bangladesh uba la suba ba u dei u dkhot jong ka kynhun pyntriem kaba la rahbor bad shoh pynmynsaw ïa u Balsrang Marak ha ka 8 tarik u Nailar, 2025 ha ka shnong Rongdangai.
Ïa une u nong Bangladesh uba la mynsaw jur, la pynkit noh wut – wut sha ka jaka ai jingsumar ha Maheshkhola PHC ban pynïoh ïa ka jingsumar bad haduh mynta ka jingshah kem jong ka kynhun pyntriem na Bangladesh ka la poi sha ka hynriew ngut baroh.
Lah ban pynkynmaw ba ki runar na Bangladesh kila wan kumba 8-9 ngut ban rung ha Rongdondai bad rahbor ïa u Balsrang hynrei une u rangbah u la ïoh ban phet na kti jong ki ha ka shnong New Rongdangdai bad leit rieh ha kawei ka ïing.
Kine ki runar kila leit tied ïa ka jingkhang jong kane ka ïing bad kila siat ruh katto katne kuli, kaba la pynlong ïa kane ka ïing ban plie ba kin rung. Kine ki runar kila shoh pynmynsaw ïa u Balsrang hashuwa ba kin phet na kane ka jaka. Ha ka janmiet sngi Saitjaiñ, ki pulit kila ïoh jingtip ba katto katne ngut na kine ki runar Bangladesh kila leit rung ha kawei ka khlaw kaba don ha Khonjoy. Mar mar ha ryngkat bad ki BSF, kila pynlong ïa ka jingkhynra bad kila ïoh kem ïa 4 ngut.
Lah ban kdew ruh ba ki pulit kila ïoh kurup ruh ïa uwei u sdie, kawei ka jingot sainar, kawei ka black magazine pouch, ka jingsop ban kah dur, u screw driver, ka wrench, ka black pistol holster, ka tari rit bad ka jingsop, kawei ka Bangladesh police ID card, 3 tylli ki pla thep pisa, 3 tylli ki wireless handsets bad 4 tylli ki charger.
