Khliehriat, Nailar 11
Ka Lumshnong YWSC bad Khliehriat YWSC ki la long ki ar tylli ki kynhun kiba la ïoh rung sha ka final ha ka lympung ïalehkai 2nd Division Football Tournament 2025 ba la pynïaid da ka East Jaiñtia Hills District Football Association (EJHDFA), hadien ba ki la khur jingjop ha ka sngi Saitjaiñ.
Ha ka jingïakhun semi final kaba nyngkong ka Khliehriat YWSC ka la pynliem noh ïa ka Lakadong Umlatdoh SSC da 1-0 kol bad kane ka la wan urlong lyngba ka shi kol ba la thep da u Kobar S. Swer ha ka minit kaba 14. Haba phai sha kawei pat ka jingïakhun kaba ar, ka Lumshnong YWSC ka la jop da 3-0 kol ïa ka Deinshalalu SC. Ïa kine la thep da u Wandame Lamare ha ka minit kaba 21, kumjuh u Rida o Rupai (69), bad Skemborlang Rupai (78).
Na ka liang ki bor pynïaid ka EJHDFA ki la pynbna ba ka jingïakhun final kan long ha ka 18 tarik mynta u bnai ha ka por 2 baje nohphai sngi.
