Shillong, Nailar 12
Ka lympung ïalehkai 64th International Subroto Cup Football Tournament 2025 kan sdang naduh 19 tarik mynta u bnai ha ka nongbah Delhi, ha kaba kin don haduh 106 tylli ki kynhun ki ban ïashim bynta ha kane ka lympung, kynthup ïa kiba nabar ri.
Ha kane ka lympung yn sakhi ïa ka jingshim bynta ki skul ha la ki jong ki kyrdan kata naduh ka Junior Boys (U-17), Junior Girls (U-17) bad ka Sub-Junior Boys (U-15).
Ïa kane ka lympung yn pynïaid da ka Subroto Mukerjee Sports Educa-tion Society (SMSES) hapoh ka jingkhmih da ka Air Force Sports Control Board, ha kaba yn pynlong ha kylleng ki jaka ïalehkai kiba ha Delhi NCR bad Bengaluru, ha kab yn pynkut ha ka 25 tarik u Nailur.
“Ngi don ruh ïa ki ar tylli ki kynhun ïalehkai na Sri Lanka bad Nepal ki ban shim bynta lang ha kane ka lympung,” la pynpaw u Air Marshal S. Sivakumar ha ki lad pathai khubor ha ka sngi Ba-ar.
“Katba ngi dangïai bteng ban bud ïa ka thong ba kongsan jong ngi ban kyntiew ïa ki khynnah kiba don sap, kane ka lympung ka ai ka lad kaba biang bha ïa ki khynnah skul ban pyni ïa ka sap jong ki, ban ïoh ïa ka jingshai bad ban pynkhreh ban kiew sha ka jingïalehkai phutbol ha ka kyrdan ba kham heh.”
Kum shi bynta jong ka jingithuh ïa ki sap ïalehkai “Indian Tigers and Tigresses”, 7 ngut ki nongïalehkai kin shah jied na kane ka lympung na ka bynta ban ïoh ka jingshah pyntbit ha ka prokram ai jinghikai sha Germany.
Ka ‘thei ïalehkai phutbol jong ka ri India ka Dalima Chhibber kaba la long kum ka synbud kongsan, ka la pynpaw da kaba ong, “Kane ka dei ka lympung kaba sdang ha ka jingïaid lynti ha ka jingim jong nga ka kam ïalehkai phutbol ha u snem 2011, bad nga sngewkmen ba nga don bynta biang ha kane ka prokram.”
“Ngi ïaid shakhmat na ka bynta ka lawei kaab phyrnai jong ka ri. Dang shen, ka kynhun ïalehkai U-20 jong ngi ruh ka la ïoh rung sha ka Asian Cup. Ka dei ka jingïalehkai kaba man la ka ri ki ïalehkai. Ngi shim ïa ki sienjam ha ka lynti kaba dei, bad ka dei ha ka por kaba biang ba ngi lah ban ïoh ïa ka jingjop.”
Kane ka lympung kan sdang shwa da ka Junior Girls (U-17) ha Delhi NCR ha ka 19 tarik mynta u bnai, ha kaba yn bud sa ka Sub-Junior Boys (U-15) ha Bengaluru naduh 2 tariku Nailur bad ka Junior Boys (U-17) kan long ha Delhi NCR naduh 16 tarik u Nailur.
Ïa ki jingïalehkai ha Delhi NCR, yn pynlong ha Ambedkar Stadium, Tejas Football Ground, Subroto Park Football Ground bad ha Pinto Park Football Ground. Ha Bengaluru, ki jingïalehkai kin long ha Air Force School Jalahalli, Air Force School Yelahanka bad ha HQ Training Command Football Ground.
Kin don haduh 106 tylli ki kynhun ki ban wan shim bynta na kylleng ki jylla jong ka ri, union territory bad jaka pule, ryngkat ki saw tylli ki kynhun nabar ri. Baroh kin don haduh 200 tylli ki jingïalehkai ha baroh ki kyrdan ïalehkai.
Ki kynhun kiba la wan bat ïa ka nam lahduh ha u snem ba la lah ki long ka Mother International School, Ranchi (Jharkhand) ha ka Junior Girls U-17, katba ka Nongiri Presbyterian Secon -dary School (Meghalaya) ha ka Sub-Junior Boys U-15 ha Bengaluru lem bad kawei na Manipur ha ka Junior Boys U-17.
Kum ban shu pynkynmaw ki kynhun ki ban mihkhmat ïa ka Jylla ha kane ka kynti kaba mynta ki long ka Mawtneng U.P & Sec School (Ri Bhoi) ha ka Under-15 Boys, kum-juh ka Nongjri Presbyte-rian SS (Ri Bhoi) ha ka Under-17 Girls bad ka North Liberty HSS (West Jaiñtia Hills) ha ka Under-17 Boys.
