Nongstoiñ, Nailar 12
Ka Hynñiewtrep Youths’ Council (HYC) West Khasi Hills District ha ka 12 tarik mynta u bnai hapoh ka jingïalam u samla Lumlang Khar-syiemlieh, President bad samla Jerimaiah Dkhar Vice President ki la leit ban ïakynduh ïa u DC ka West Khasi Hills District Bah Garod LSN Dykes hadien ka jingud ki samla pule ba kwah pule ha DIET Nongstoiñ halor ka seat kaba don tang 50 tylli hynrei kiba aplai pat da ki palat 2000.
Hadien ka jingleit ban ia kynduh ia u DC , haba kren bad ki nongthoh khubor ki nongkitkam ka HYC ki la pynpaw ba na kaliang ka HYC kala kyntu ia u DC ba un turklar iaka jingpynbeit iaki Seat pule ha DIET, Nongstoiñ.
Ki la ong ruh ba ka HYC kala kdew ba baroh shi katta haduh mynta ki ïaid beit ban shim 8 ngut kawei ha block na ka West Khasi Hills District, na Eastern West Khasi Hills District bad South West Khasi Hills District hynrei la 3 snem la ïohi naduh ba ha West Khasi Hills District ka la don 5 tylli ki block hynrei ka jingpynbeit seat ka dang neh mar katjuh, kumta ka HYC ka kwah ban dei ban mih kyrtong lang na baroh ki Block kata na ki 9 Block na 3 tylli ki District.
Shuh shuh ki la ong ruh ba ka jingkwah jong ka seng ka long haba ha West la don 5 tylli ki C&RD Block kata ka Nongstoiñ Block, Mawshynrut Block, Rambrai Block, Ri Mulliang Block bad Shahlang Block dei ban mih noh la ka jong ka jong ka Block haba ki la ïoh Block la 3 snem tam, kumno ka DIET Nongstoiñ kam ïathuh ïa ki, khnang ban lah ban sei nonghikai da kiba na ka thaiñ lajong ban kyntiew ïa ki jingpule ha ka thaiñ.
“Ngi dawa ba dei ban sdang noh naduh snem ban wan 2026, dei ban pyrkhat thymmai ha ka rukom phiah thup jong ki nongïakhun katkum kitei ki block namar haduh mynta ba la ïoh ïa ka Ri Muliang, ka Shahlang bad ka Rambrai Block kim pat paw ba ki don ki thup kyrteng watla 3 snem ki la ïoh Block,” ong ki nongïalam ka HYC.
Ha kajuh ka por ka HYC ka kyrpad ruh ïa u DC ban ïarap lem ban kyntiew ïa ka Seat na ka 50 sha ka 100 ha Nongstoiñ DIET khnang ban myntoi ki samla.
Shuh shuh ki la ïathuh ruh ba na ka liang u DC u la kular ban shimkhia ban ïakren ha ka District Level Education Committee bad ban kyntu ïa ki bor ba dei peit katkum halor ka jingkyrpad jong ka HYC.
