Shillong, Nailar 12
Ka Riti Academy of Visual Arts ha ka 12 tarik Nailar, 2025, ka la sam khusnam sha ki 5 ngut kiba ïoh jingithuh na ka jingtbit jong ki bad ka jingnoh synñiang jong ki ha ki kam bapher bapher, kaba la pynlong hapoh ka Raj Bhavan, Shillong.
Ïa kine ki 5 ngut la pynkup burom da u Lat ka Jylla, u CH Vijayashankar uba long kum u Kongsan ha kane ka sngi, katba u Bah FR Kharkongor uba dei u Principal Secretary ka tnat Arts and Culture u la long kum u Symbud Kongsan bad ha ka jingïadonlang u Dr. BDW Tiwari, IAS, Com-missioner & Secretary sha u Lat.
Kine ki 5 ngut ki long u Bah Rangkitbok C Dohkrut da ka khusnam “S Quotient Sumer” uba la synñiang ha ka jingthoh poitri ha ka ktien Khasi da kaba pynkylla na ka ktien Nongwei sha ka ktien Khasi bad uba dei ruh uba ju noh synñiang ha ka ban pynneh pynsah ïa ka mariang
U Rangkitbok u dei u sur ba dang mih ha ka thoh ka tar Khasi ba mynta uba ka jingtrei jong u ka la pynwandur thymmai ïa ka jingpynpaw poitri ha ka ktien tynrai. U myllung, u nongpynkylla ktien, bad u nongsumar mariang, ka jinglum poitri ba pawnam jong u Bah Dohkrut ha u snem 2021, “Ka Maïa Jong Ka Por” ka la pynithuh ïa ki nongpule Khasi sha ka jingïasnohkti lang jong ki dkhot laitluid, ka Haiku, bad ka Tanka kaba pynïasoh ïa ki jingsngew Khasi bad ki riti dustur poitri jong ka pyrthei.
Nangta, u Dr. Mebanlamphang Lyngdoh da ka khusnam “Rana Kharkongor” na ka bynta ka sur rwai sur tem bad ka thoh ka tar bad uba la noh synñiang ha ka liang ka jingwad bniah ban tip ïa ka put ka tem tynrai Khasi bad jong ka Meghalaya baroh kawei. Kum u Assistant Professor, u Dr. Mebanlamphang u dei ruh uba la pyndep ïa ka Ph.D ha ka Duitara.
U Bah Kyrmenlang Uriah da ka khusnam “Sumar Sing Sawian” uba la shah pynkup burom halor ka jingnoh synñiang jong u ha ka kam thoh khubor, uba ju shakri ha kiba bun ki kam ha ka imlang sahlang, bad uba dei ruh u nongsengkam sengjam bad uba dei ruh u Editor-in-Chief jong ka lad pathai khubor “Shillong Mail”.
U Bah Ram Kynjiñg da ka khusnam “Prithpal Singh Sehdave” uba la shah pynkup burom halor ka jingnoh synñiang jong u ha ka liang ka rukom oh shrong ne oh dur ha ki rukom bapher bapher, khamtam ha ka rukom pynwandur ïa ka jingriew spah ka kolshor u Khasi kaba la khring ïa ki paidbah halor ka rukom treikam bad ka sap ba kyrpang jong u.
U Bah Ricky Paul Marweiñ da ka khusnam “Crystal Gayle Kharnaïor” uba la shah pynkup burom halor ka jingtbit jong u ha ka ban shna pynwandur ïa kiei kiei ki durkhih ha ki Cinema. U Bah Ricky u dei uba la pas ïa ka Graduate ha ka Digital Media na St. Joseph’s College Bangalore, bad uba la trei ruh hapoh ka karkhana pynmih phlim ka Hollywood, French Cinema bad kumjuh ruh hapoh Bollywood. U Bah Ricky u la ïoh ruh ka jingïaroh halor ka jingshna pynwandur kum ïa ka Musafa: The lion King, Prey Ant Man and the Wasp bad kiwei kiwei.
Haba ai jingkren ha kane ka sngi, u Lat ka Jylla u la ong ba ka jingnoh synñiang sha ka imlang sahlang bad ka jinglen lade ha kano kano ka kam, ka dei ka kam kaba neh shyrta.
U Lat u la ïaroh bad ka jingkitbok kitrwiang ïa baroh ki nongïoh khusnam ha kane ka sngi ba kin dang ïai bteng ban leh ïa ki kam babha bad kiba ai jingmyntoi ïa ka imlang sahlang baroh kawei.
U Lat u la ai jingïaroh ruh ïa ki kam bakhraw jong ka Riti Academy bad pynshlur ïa ki tnat Sorkar ba dei peit ban kyrshan ïa kum kine ki jingthmu ban kyntiew ïa ki samla trai ri.
U la kyntu ruh ïa ki samla ba kin ïaleh ban long kiba tbit da ka jingaiti lut bad ka jingtrei shitom, namar ym don kaei kaei kaba ym lah ban long da kine ki jinglong.
La pyniphuh iphieng ïa kane ka sngi da ki sur jingrwai ba la ai da ka Samla Dalariti G Kharnaïor ïa la ka hymmen, ka Samla Crystal Gayle Kharnaïor (Bam kwai ha dwar u Blei) bad kaba dei ruh ka sngi lyngkhuh ïap baphra jong kane ka samla kaba khlad ha u snem 2017.
